1290/2023-2024
Aizawl, 27.07.2023: Ni hnih awh tur Zoawi Kut 2023 chu vawiin khan Dawrpui Multipurpose Hall-ah Art & Culture Minister Pu R. Lalzirliana chuan khuallian niin a hawng. Zoawi Kut hi North Eastern Council (NEC) bultum niin Art & Culture Department leh MZI Gen. Hqrs. tangkawpa buatsaih a ni a. Kut thupui hi "Unity through Music" (rimawi kaltlanga inpumkhatna) tih a ni.

Khuallian Minister Pu R. Lalzirliana chuan impumkhatna thupui hmanga a vawikhat nan Zoawi kut buatsaih chuan rimawi leh lam hmanga India hmarchhak state a chengte a hnuhhnaih ngei a beisei thu a sawi a. ‘Culture’ hi ram leh a chhunga chengte min chawimawitu, khawvel hmuha min pholangtu leh hnam anga min phuarkhawmtu a ni, a ti a. Art & Culture Minister chuan India hmarchhak chu India state dangte lakah danglam bikna tam tak neiin, hnam tlem zawk kan nih tlangpui avangin kan hnam ziarang theuh hlu tak takte hi kan hloh mai loh nan kan chawilar a kan chhawm nun zel pawimawh a tih thu a sawi a. Minister chuan Mizoram thenawm Myanmar leh Manipur a buaina thleng te en in, inpumkhat a tul zia a tarlang nia a hriat thu leh, remna leh muanna a thlen thuai a beisei thu a sawi bawk.

Chief Secretary Dr. Renu Sharma pawhin he hunah hian thu sawiin, kut thupui chu tunalai kan hunt awn nen a inhmeh tak a nih thu sawii, inpumkhatna hi tun darkar a kan mamawh langsar ber a ni, a ti a. Mimal leh hnam anga kan nun a rimawi in hun pawimawh tak a chan dan te, mi phuarkhawtu a nih dan te sawiin, hnam hrang tawng hrang hmangte pawh rimawi hmangin kan inpumkhat thei a ni, a ti a. Inpumkhatna chu kan danglamna, kan inhriatthiamlohnate sukiang a, inhriatthiamna te, inkhawngaihtawnna te leh inrintawnna te nei tura a pawimawh thu a sawi a. Zoawi Kut chuan he inpumkhatna thinlung hi India hmarchhak state unaute zingah a thara a thlen leh ngei a beisei thu a sawi.

Art & Culture Director Pi Carol VLMS Dawngkimi chuan kalkhawmte lawmna thu sawiin, Mizote nuna lunglen ni ah te, lawm ni ah te hla leh zai hi bet tlat, hnam ziarang pawimawh tak a nih thu a sawi a. He kut hian hnam hrang hrang karah kan danglamna kalkan in rimawi leh lam hmanga inpumkhatna a thlen ngei a rin thu a sawi.

Zoawi Kut ni khatna ah hian Mizoram bakah Tripura, Meghalaya, Assam, Nagaland leh Arunachal Pradesh atangin zaithiam hrang hrang leh cultural troupe te telin zai leh lam ngaihthlak a thlirho a ni.

Zoawi Kut ni hnihna hi July ni 28, 2023 chawhnu dar 2 atanga hman tan tur niin H&FW Vice Chairman Dr. Z.R. Thiamsanga chu kuallian a ni ang a, NEC Director (Tourism & Industries) Pi R. Lalrodingi chu khualzahawm a ni bawk ang.