1291/2023-2024
Mamit 27th July, 2023 : Vawiin khan Chhimveng YMA Hall, Mamit-ah Govt. Mamit College, Freshers' Social & Graduation Day - 2023 chu Er. H.Lalzirliana, Bialtu MLA/ Vice Chairman, Roads & Infrastructure Development Board chuan khuallian niin a hmanpui. Bialtu MLA chuan Govt. Mamit College atanga Graduate thar zawng zawngte a lawmpui thu sawiin, Principal leh Staff te thahnemngaihna leh thawhrimna azarah result duhawm tak Mizoram University hnuaiah pali (4) -na hial an hauh chu a lawmawm hle a ni a ti.
Zirlai duhawm tak takte chu an zir/kal lehzelna turah mahni nihna leh dinhmun kan zahpui tur a ni lo a, nih tum leh nih tur tam tak kan neihte'n beiseina nung min pe sela, malsawmna hi van atanga tla dawn tur nilovin, thawhrimna leh beih tang tangna atanga kan hlawhchhuah tur a ni a ti.
Pu Zira chuan naupan tet atanga hostel-a awm, phaia lehkha zir chhuak, kan hnam leh sakhuana hmuhniam dawn dawn an awm thin a, hei hi a pawi hle a ni tiin kan thiamna leh finna hian min hruai bo lul lo sela, ram leh hnam tana chhenfakawm tak ni turin zirlai kalkhawmte a chah a, kan zirpuite'n dinhmun tha zawk an chang a, kei aia thiamlo-a ngaihte'n hna an hmu ni-a kan hriat hun a lo thleng ang, hei hi kan nunah test/enchhinna kan paltlang hun a ni a, hmalam pana kan tumah chhel taka kan kal zel a ngaih hun lai tak a ni a ti.
Zirlai naupangte chu awmna group thlang fuh a, rilru dik leh khaw hawi tidik turin a chah bawk a ni. Pu MS Dawngliana Hnamte, Principal, GMC pawhin inlawmna thusawiin Graduate tharte duhsakna a hlan a. Zirlai lut tharte pawh duhsakna hlanin, zirna piahlama a behbawma inhmang ral mai lovin, kum thum (3) chhung Mamit College-a kan zirna chuan eng nge a hrinchhuah dawn tih chu keimahni theuhah a innghat dawn a ni a ti. Dr. Alexander Lalrinzama, Asst. Prof. Dept of English kaihhruaina-in Graduate tharte Certificate hlanna hun hman a ni.
Semester result chhuak hnuhnung berah Mizoram University-ah pali-na niin, Mamit College semester result hnuhnung berah hian Distinction pakua (9) leh First Division-ah mi 45 an vaiin mi 54 Graduate thar an awm a ni. Khuallian hian Mamit College Geography zirtirtute hlawh atan Rs. 120,000/- (nuai khat singhnih) , NCC tan Rs. 30,000/- (singthum) leh Mamit College zirlaite tan Football, Volleyball, Basketball leh Net bakah Library-a dah tur lehkhabu engemawzat a hlan nghal a ni. Govt. Mamit College hi Kum 1983 April Ni 1 khan khawtlang nu leh pa kal khawmin an din a ni.
A tirah chuan Private College niin zirtirtu leh zirlai tlem te nen Middle School leh Primary School-ah te class kal thin a ni. Zawi zawia hma sawn zelin tunah chuan NAAC B+ Accreditation neiin infrastructure changtlung tak leh zirtirtu leh zirlai thahnem tak neiin, he College hian hmasawnna kawng a zawh mek a, tunah hian zirlai 132 awmin, thawktu teaching faculty 31 leh Non Teaching staff 9 an vaiin thawktu 40 an awm mek a, Subject 7 (pasarih) English, Mizo, Education, Political Science, History ,Economics, Geography zir theihna a awm mek a ni.
Vawiin hun hi Pu H. Ramdinpuia, Associate Professor, Department of Political Science chuan a kaihruai a, Pu LDV Infimate, Associate Professor, Dept. of English chuan hunserh hmangin, K Vanlalnghaka, Associate Professor, Dept. of Political Science chuan lawmthusawina a nei a. Graduate thar Department hrang hrang atangin thusawi ngaihthlak a ni a. Second Session hi Malsawmzuala & C. Lalnunfeli, SU Leaders te kaihhruaina-in hman chhunzawm a ni bawk.
