DIRECTORATE OF INFORMATION & PUBLIC RELATIONS, Government of Mizoram, India

Vawiin chawhnu khan Chanmari YMA Hall-ah Art & Culture Department hnuaia Mizoram State Library buatsaih 7^th Librarian’s Day hman a ni a. Art & Culture Minister Pu R. Romawia chu Khuallian a ni. Kum 2009 khan Ministry of Culture hnuaia Raja Rammohun Roy Library Foundation (RRRLF) chuan Father of Library Science ti-a hriat Dr. S.R.Ranganathan hriatreng nan a pianni August Ni 12 hi ‘Librarian’s Day’-a hman turin a puang a ni.

Khuallian Pu R. Romawia chuan 7^th Librarian’s Day hman a ni chu lawmawm a tih thu sawiin mi pawimawhte hriatreng leh an hmachhawpte tihlawhtling tura hmalak hi kan tih tur a ni , a ti a. Lehkhabu chu finna inchhekkhawmna a ni tiin finna nei tur chuan lehkhabu chhiar tam a ngai a ni, a ti a. Mizo thalaite chu khawvel inelna sang zelah lehkhabu hmang tangkai turin a chah a. Hnam ropui apiangin lehkhabu an ngaih pawimawh thu tarlangin lehkhabu chhiar tam hi thil finthlak , kan pianpui finna baka hmalam thui tak min hruai theitu a ni, a ti a. Zirna In-ah pawh library tih changtlun zel a tul thu sawiin zirlaite chuan library an luhchilh tam a ngai a ni, a ti a. Lehkhabu chhiar tur thlan fimkhur a tul thu sawiin lehhka chhiar tam chungchangah inhrilhhriatna neih a pawimawh thu a sawi bawk a ni.

Mizoramah hian kum 2010 atang khan ‘Librarian’s Day’ hman tan niin Mizoram-a Public Library neih zat chu State Library – 1, District Library – 5, NGO enkawl Govt. Recognized Public Library – 485 te an ni a. Tun dinhmunah hian Library Member 6209 an awm a ni.

He hun hi Art & Culture Director Pu R. Hmingthanzuala chuan a kaihruai a, State Librarian Pu Lalramliana atangin report ngaihthlak a ni a. Mizoram University Librarian Dr. Lalremsiami chuan ‘Mizoram Library-te tana hmathlir’tih hmangin thu a sawi a. Art & Culture Joint Director Pi Carol VLMS Dawngkimi chuan lawmthu sawina in hun a khar a ni.

7^th Librarian’s Day lawmna denchhen hian Essay Writing Competition buatsaih a ni a. Essay thupui chu “ Library tha nei tura ka hmathlir” tih niin Category I (Higher Secondary School) leh Category II (High School)-a then a ni. Zirlai 24 in an essay ziahte an thehlut a. Competition-a tithate hnenah hian pawisa fai bakah certificate leh lehkhabu hlan a ni.

CATEGORY I