Aizawl khawpui chhung tawt tak, lirthei leh kea kal te tan pawha buaithlak tak karah Aizawl City Traffic Police-te chuan theihtawp chhuahin hma an la zel a. Chutih laiin lirthei khalhtu tam takin ‘Supreme Court Committee on Road Safety’ in a ngaih pawimawh zual Traffic dan bawhchhiatna pali (4) :
1. Zu/Drugs rui chunga lirthei khalh
2. Chak taka lirthei khalh (Over Speed/Excessive Speed)
3. Phurh theih chin tur tukzat aia rit thil phurh (Over loading) leh bungraw phur chi lirtheia passenger phur te, passenger phur chi lirthei a bungraw phurh te,
4. Lirthei khalh chunga Mobile Phone hman
A chunga tarlan engemaw ber bawhchhetu driver man chu driving license man sak nghal a, thla 3 (thum) chhung lirthei khalh theilo tura a driving license suspend sak tura tih a ni a, chumi hnuah man nawn leh an nih chuan lirthei khalh thei tawh lo tura an driving license cancel thlenga hremna lek theih a ni. Vawiin thlengin Aizawl khawpui chhungah heng dan bawhchhia lirthei khalhtu driving license 22 lai suspend sak an awm tawh a, hemi bakah driving license suspend tura DTO, Aizawl hnenah thawn mek engemaw zat a awm bawk.
Aizawl khawpui chhungah lirthei khalhtu engemawzat fel tak tak an awm laiin, engemawzat la fel tawk lo dan bawhchhia an la awm reng a, a bik takin rui chunga lirthei khalh man chu dim an ni lovang. Traffic Police-te hmun tinah an awm sen bik loh avangin mipuiten nasa lehzuala dan zawmin Traffic Police-te tawiawm turin kan ngen tak meuh a ni. Kan zavai a kan him a, kan dam tlan nan lirthei khalhtute fimkhur taka lirthei khalh thin turin kan inngenin kan inhriattir nawn leh a ni. Heng traffic dan bawhchhia man ngai hmu leh emergency thila Traffic Police puihna mamawh tan a hnuaia tarlan phone number-ah hian information pek theih reng a ni :
Aizawl Traffic Police Help-Line :
Traffic Station/Control Room - 0389-2322307/0389-2313061/9485302049
Dy.SP, Traffic - 8974241998
OC, Traffic - 9862376929
Aizawl khawpui pawn lamah erawh chuan Police Station/Police Outpost hnai ber zelah information pe thin zawk turin kan hriattir bawk a ni.
