1469/2022-2023

Aizawl, 4th August, 2022: Vawiin khan Art and Culture Department buatsaih Mizoram pum huap Pi Pu Zai Intihsiak 2022 kharna leh lawmman semna hun, Aizawl Vanapa Hall a neih chu Art and Culture Minister Pu R.Lalzirliana’n khuallian niin a hmanpui.

Khuallian Pu R.Lalzirliana chuan khawvela hnam dingchhuak te reng reng chu an hnam nunphung vawnghim tlat tute an ni zel a, mahni hnamzia chawinun nachang hre lo chu hnam bo leh hnam ral, an vela hnam dangte chimral leh lem zawh an ni mai thin, a ti a. Mizote pawh hnam nunphung vawnhim leh chawi lar kawngah kan thangharh chho ve ta hi a lawmawm hle a, hei hi Mizote hnam anga kan dam khawchhuahna tur kawng pawimawh tak a ni, a ti. Khawthlang nunziain kan khawtlang nun leh tualzal nun, kan incheina leh sakhaw biakna, kan hla leh a behbawm zawng zawng nasa taka a kaihhruai mek lai hian, hnam kan humhalhna kawng pawimawh tak leh Mizo anga khawvel hriata kan inphochhuahna atana pawimawh ber zinga pakhat chu - tu hnam tihdan mah kan zir leh entawn loh pi pu zai hi a ni a, rimawi lama kan changkan chhoh zelna tur atana kan hmabak chu he kan pi pu zai ‘folk song’ chawisan a chawinun chhoh zel hi a ni, a ti. Tun tum Pi Pu Zai intihsiaka zaite chu chhuanawm a tih thu sawiin Pu R.Lalzirliana chuan “Pi pute hunlaia min chentir thei khawpin in zai thiam tlangin ka hria, zai zel ula, Mizo mipuiteah kan folk song hian hmun a luah sang zel dawn a ni”, a ti a. Folk song hi zaithiam nazawng tana sak thiam chi a ni lo a, hetiang lama mi bik an nihna vawng nung tlat a, chawisang zel turin a fuih a ni.

July, 2022 chhung khan Art & Culture Department chuan  kum 14 chin chunglam tel theihna Pi Pu Zai Intihsiak 2022 hi a buatsaih a. He intihsiakah hian Mizoram pum atangin mi 31 an tel a.  Audition hi video clip-a thehluh niin endiktuten an zing atangin a titha zual mi 12 an thlang chhuak a. Heng mi 12 te hian vawiin vek khan Aizawl Vanapa Hall-ah intihsiakna an neih chhunzawm a. C.Lalbiaknii, Ainawn Veng chu pakhatna niin pawisafai cheng 30,000, trophy leh certificate a dawng a. Pahnihna chu Ngurthansanga, Khawruhlian niin cheng 20,000, trophy leh certificate a dawng a. Pathumna Lalrinmawia Chawngthu, Durtlang chuan cheng 10,000, trophy leh certificate a dawng a. Mi pakaw dangte hnenah hian Consolation Prize cheng 5000 leh certificate hlan a ni bawk.

Vawiin programme ah hian Art & Culture Director Pu R.Hmingthanzuala chu Chairman a ni a. State Level Pi Pu Zai Intihsiak Committee Chairman Pu Lalchuailova, Art & Culture Deputy Director chuan report a pe a. Pu F.Lalthanmawia, Senior Reasearch Officer, Art & Culture Department chuan lawmthu sawina hun a hmang a ni.