1470/2022-2023

Aizawl, 4.8.2022: Vawiin khan kumin January thlaa sorkarin a din, Mizoram Resource Mobilization Committee te chuan a vawi hnihna atan Chief Minister Pu Zoramthanga chu a office-ah kawmin, an hmalak tawhna leh hmalak leh zelna tur an sawipui.

MRMC hi an din tirh January ni 21, 2022 atanga tun thlengin vawi 9 an thukhawm tawh a. Hemi bakah hian consultation meeting vawi 3 an nei tawh bawk. Sawrkarah rawtna hrang hrang an thlen tawh a. An rawtna te sawrkarin tha taka a bawhzui thin avangin CM hnenah hian lawmthu an sawi a. An rawtna anga sawrkar office te bank account-a pawisa pung sawrkar sum bawma chhun luh chu cheng vbch 37 zet a tling tawh a. DC Aizawl hnuaiah Mizoram Public Demand Recovery Act, 2001 kengkawhtu 'certificate officer' turin Addl DC dah a ni tawh a. Picnic Spot te, Catering Service leh Spa ah te GST lak a nih theih nana mumal taka regulate an nih theihna tura Allocation of Business Rules 2019 hnuaiah Tourism kuta dah a ni ta te chu lawmawm an ti a, Agriculture LSC/Periodic patta te in hmuna leh (convert) dawna ram 30% emaw 40% emaw surrender ngai thin engemaw hun chhung atana tihtawp an rawtna bawhzui mek a ni a, state-a leilung hausakna, GST lakna tur items ni si, kan lak ve ngaih lohna - lung, rawra, etc. ah te lak ve ni se tia an rawtna te pawh sawrkarin a bawhzui mek a, chak zawka bawhzui ni se an duh thu CM hi an sawipui bawk a ni. Department hrang hrangte'n an sum hmuh (receipt) online hmanga pek theihna siam tur leh computerised system hmang tura an tihna chu Department lamin an zawm tha vak rih lo niin an hria a, chak zawka hma lak ni se an ti.

MRMC chuan Mizoram lui pawimawh tak, Aizawl khawpui tui tlan ber, Tlawng lui chu enkawl a ngai hle an ti a, hemi kawnga sawrkarin "Save Tlawng River" programme a siam chu tha an ti a. He thila mawhphurtuten he programme hi chak tak leh rah chhuah tha tak neia kalpui a nih theih nan hemi atan hian kan tui bill atangin 5% cess lak ni se tha an tih thu CM hi an sawipui bawk.

CM hian MRMC te hi tha taka lo dawngsawngin an hmalaknaah lawmthu a hrilh a. Hmachhawp hrang hrang sawipuiin chak leh zuala hmalak a nih theih nan theihtawp chhuah a inhuam thu leh sawrkar pawh a inhuam thu a hrilh.

MRMC hi an chairman Pu H. Rammawi a'n a ho a, Vice Chairman Pu Liansuama leh member dangten an tawiawm a ni.