Ni 4 awh Art Workshop 2017 chu vawiin khan Archive Hall, Babutlang-ah khar a ni ta a. Art Workshop hi Information & Public Relations Department leh Mizoram Art Development Society tangkawp ten an buatsaih a ni a. Ni li (4) kalta chhung khan Aizawl leh Zo khaw lam atanga lemziak leh lemker tuimi mi 50 rual kalkhawm ten mahni duh ang lemziak leh lemker hna an thawk a, vawiin khan a hmawr an bawk ta a ni. 

Art Workshop neih chhung hian tlawhtu engemaw zat an awm a, sikul naupang leh mimal thahnem takin a taka hnathawk lai an en a ni. Lemker thiam mi 3 ten ngawrh taka an hna thawh chuan mi a ti tlai hle a. Mizoram Art Development  Society hian an thiam thilte nasa lehzuala mipuiten an hlut theih nan hetiang  workshop hi thil zawng chhang tlak tak a ni an ti a, an kutchhuakte ram chhung leh ram pawna pho chhuak uar lehzual turin nasa lehzuala tanlak nise an ti a. Ram leh hnam zia awlsam taka phochhuahna leh inlaichinna thleng pawha siam thei painting leh lemker te hi sawrkar hotute pawhin nasa lehzualin hlutsak se an duh thu MADS hotute chuan an sawi a ni.