MHIP Day vawi 43 na chu nimin khan Lungdai MHIP Branch pawhin ropui takin Lungdai Branch YMA Hall ah an hmang a. He hun hi bialtu MLA leh Parliamentary Secretary nibawk Pu Hmingdailova Khiangte chuan khuallian niin a hmanpui a ni. 

Khuallian Pu Hmingdailova chuan MHIP Day vawi 43 na hmangtu zawng zawngte duhsakna chibai a buk a. Khawvel ram hrang hrangah hnam mawl leh hmasawn lohna ram apiangah Hmeichhe dinhmun a hniam a, tih duhdahna a hluar  a ni tiin, keini Mizote ngei pawh kan pi leh pute hunah chuan mawlna avangin Hmeichhe dinhmun a hniamin Hmeichhia ten in chhungah leh khawtlang nunah dinhmun tha leh duhsak an hlawh ngai lova, an dinhmun a hniam hle a ni. 

Kan ramah Kristianna a lo lut a, chumi a zarah chuan Hmeichhiate pawhin zirna kawng an lo zawh chho ve zel a. Mithiam hmasaten Mizo Hmeichhe dinhmun chawisan a ngaihziate hriain he pawl ropui tak MHIP dinna chang an hria hi Mizo Hmeichhiate tan chuan malsawmna a ni chiang hle a ni. MHIP hmalakna ropui tak avangin Mizo Hmeichhe dinhmun chu vawiinah chuan mipate tluk loh Hmeichhe chhuanawm tam tak an lo awm ta a ni. 

Zirna kawngah pawh mipaten kan tluk ta mang lo. Eizawnna kawngah pawh bazaar-ah leh office hnathawkah pawh mipa aiin hmeichhia an tam zawk ta daih mai a. Heng hmeichhiate hmasawnna zawng zawng hi a bul lamah chuan Mizo hmeichhe lehkhathiam hmasaten MHIP an lo din vang a ni, a ti. 

He pawl ropui tak MHIP hi lungrual takin kal zel se, pawl thianghlim a nih na vawng nung zelin Mizoram tan Mizo Hmeichhia ten an theihna nasa lehzuala hmang zel turin duhsakna a hlan a ni, a ti.

MHIP Day lawmna ah hian Dr. Zairemmawii, Medical Officer, Lungdai PHC leh Mizoram Rural Bank, Lungdai Branch Manager te pawh an tel a ni.