Vawiin khan DC Conference Hall Mamit-ah Pi Lalbiaksangi, District Bawrhsap hovin Mamit District chhunga kawngpui, fur ruahtui tlain a tihchhiatte chungchang ngaihtuahin kawngpui enkawltu Department leh Contractor-te nen hmalak dan tur sawiho a ni.

Vawiin Meeting-ah hian Mamit District Bawrhsap chuan kumin fur chu kum dang aia ruahtui a tlak tam avangin kan kawngpuite a chhe nasa a. A bik takin Buhfai leh Eirawngbawlna Gas-ah duhthusam kan pha lo tan a, hei hi engdang vang nilovin kan chakkhai lakluhna kawngpuite Supply Contractor te’n Mamit District chhunga kawngpuite an zawh ngam loh vang a ni a. A ranglama chakkhai phur Motor liante chu an tumna hmun thleng thei ngei tura kawngpui chhelaite hnawhkhata Motor kal theih tura siam tha turin a enkawltute chu a hrilh a. District chhunga kawngpui hrang hrang, a bikin Supply Godown awmna khua Motor Load lain a zawh theih tura siam tha turin a enkawltu Department leh Contractor te chu hmalakpuia sawmin mipui mamawhna hria a, tihlawhtlin ngei turin a ngen bawk.

Bairabi Tlawng lei (Bridge) chu dawhzawh tawh nimahse approach road te chhiat vangin leh leiin a dawl tawk test na (load test) la tih loh anih avangin chakkhai phur, load motor te chu kaltlang phal a la ni lova, hei vanga harsatna awm hrang hrangte chu Meeting-ah hian sawiho a ni a. A ranglama load test nei a, approach road-te siam tha turin a enkawltu PWD Kawrthah Division leh Contractor-te Meeting-ah hian ngen an ni a. Damchhuah leh Mamit inkar, National Highway khawihtu PWD hotute chu a ranglama Motor lian pawh tang lova tlang thei nghal zel tura siamtha turin ngen an ni a. Dampui Ngaw Diversion pawh a ranglama lai tlang a, mipuite harsatna sutkian a nih theih nan chak taka hmala turin Meeting hian a ngen bawk a ni.

Mamit District chhunga Western belt lamah pawh ei leh bar supply tha taka a luh theih nan a enkawltu GREF (General Reserve Engineering Force)  te chu karleh chhung ngeia chakkhai phur Motor-te lut tlang thei tura hmala tur leh PWD Kawrthah Division te pawh Mamit leh Kanhmun inkar kawngpuite chu chakkhai phur motor te’n an zawh tlang theih turin  kawngpui chhelaite siama hnawhtha turin ngen an ni bawk.

Vawiin Meeting-ah hian Executive Engineer, PWD,  Mamit Division/Kawrthah Division/NH  Division-I, Officer Commanding, GREF, DCSO Mamit, Chairman, Jt. V/C Mamit, President, Sub-Hqrs YMA Mamit, President, MJA Mamit bakah Contractor hrang hrangte an tel a ni. 

Attachment

  • Loading attachment...