Pu C.Thatkunga, Secretary, I&PR chuan vawiin khan Information & Public Relations Department leh Mizoram Arts Development Society tangkawp buatsaih ni li chhung awh tur Art Workshop-cum-Seminar, Archives Hall, Babutlangah a hawng. Hawnna inkhawm hi Pu Jim K.Chozah, Director, I&PR-in a kaihruai a; Pu Laltanpuia, President, MADS chuan he workshop-cum-seminar-in a tum tlangpui a sawi bawk.

Pu Thatkunga chuan lemziak lam mi tui tak tak leh talent nei tha tak tak engemawzatin mahni intumin theih ang ang hun rei tak an lo thawk tawh chu fakawm a tih thu a sawi a. Beidawng duh hauh lova an thiam thilte tihhmasawnna tur leh pholang tura hun leh hmun an lo dap thin tawh thu te chu lawmawm a tih thu a sawi. Mizoram pholangtu pawimawh tak chu Mizo Artist-te hi an nih thu Pu Thatkunga chuan a sawi bawk a. Lemziak lama hmasawn lehzualna tura Art Workshop-cum-Seminar neih hmasak ber hi hlawhtling taka hmang ngei turin leh lungrual taka thawk chhunzawm zel turin duhsakna a hlan a ni.

He Workshop-ah hian lemziak mi Mizoram hmun hrang hrang atangin mi 43 an tel a, May ni 24 hian workshop neih chhunga an lemziahte pholanna Archives Hall, Babutlangah an nei ang.