Vawiin chawhnu khan Aizawl DIET Committee Room ah Art & Culture Minister Pu R.Romawia chuan ni 5 chhung awh tur ‘Artist in Residency in Painting & Painting Workshop’, Lalit Kala Akademi Regional Centre, Kolkata, Art & Culture department leh Mizoram Tribal Art & Craft society(MizTACS) te tangkawpin a buatsaih chu a hawng.

Art & Culture Minister Pu R.Romawia chuan Mizo pi leh pu ten thangthar te hmuhtheih turin lemziah ropui tak leh Mizo History chhui theihna tur hnutchhiah an neih tam loh thu a sawi a. Kutthemthiam thil leh hmangchang tam tak, thangthar ten an nitin nuna an hman tangkai chi leh an hnathawh ti awlsam tur atana hman theih erawh an zirtir a ti a. “Khawvel changkang chho zelah Mizo te chu midang te hnen atanga inzir chak tak kan ni a, rimawi ah phei chuan midang aiin kan hniam tawh bik lo. Lemziah huangah erawh chuan tan kan lak nasat a ngai a; kum za tam tak a liam hnuah pawh Mizo hnam nunphung leh tuna kan khawsak dan te hi miten enlet dawn ta se, kan lemziak thiamte kuthnu thlir hmasak a la ni dawn a ni”, tiin lemziak chu history chhuikir nan pawh a tangkai thu a tarlang. Art & Culture Minister Pu R.Romawia chuan khawvelah lemziaktu ropui tak tak, an lemziah te pawh tunthlenga khawvelin mawi a tih leh a ngaihsan, sum taktak pawh a lei hleih theihloh hmuhtur a awm a. Khang lemziakthiam te khan an lemziah hun lai khan sum leh pai chhutin lem an ziah a rinawm loh tiin lemziakthiamte chu sum ringawt hisap lova an tuizawng te chhunzawm zela khawvelah hnutchhiah ropui neih tum turin a chah.

Artist in Residency in Painting & Painting Workshop hawnna programme hi Pu R.Hmingthanzuala, Director, A&C in a kaihruaia. Pu Siddhartha Ghost, Regional Secretary, Lalit Kala Akademi, Kolkata pawh in workshop an neihchhan leh an kalpui dan tur te a tarlang a. He Workshop ah hian Artist ten lemziakthiam Pu Samindranath Majumdar hovin an kutchhuak inkawhhmuhna leh lemziakna hunte an hmang ho dawn a ni.