Health Minister Pu Lal Thanzara, Mizoram Football Association (MFA) President ni bawk chuan vawiin chawhma khan Tlungvel Public Playground-ah Princess MIMI Cup Open Running Football Tournament a hawng. Princess MIMI football tournament buatsaihna atana sum senso hi Darlawng khaw chhuak, Germany a pem ta, Pi Lalhmingliani’n a tum a ni.

Pu Lal Thanzara chuan sawkarin thalaite khawvel din tura ruahmanna a siam tihlawhtlingin infiamna kawngah Mizoram chu nasa takin a thang a, khelmual tha tak tak siamin MFA pawhin football inelna sang Mizoram Premier League hlawhtling tak a buatsaih theih phah a ni, a ti a. MPL hlawhtlinna rahchhuah lang chhuak zelin India ram club hrang hrangah Mizo footballer 200 chuang an awm tawh a, India leh khawvel hriathlawh inkhel thiam, kum khata nuai 50 chuang hlawh pha Mizote zingah an awm tawh, a ti. MFA President chuan MPL hi All India Football Federation (AIFF) hriatpuia khelh niin FIFA hial pawhin Mizo inkhelthiamte hmelhriat phahin tunah hian sawrkarin MFA hnena ram a pek, Sairang Dintharah khelmual laih mek niin FIFA chuan phul lem a phahsak dawn niin a sawi a. Mizo rawlthar inkhelthiam thlanchhuah 17-te pawhin zirna tluang pangngai leh football khelh zir turin Germany-ah November thla hian an kal dawn a ni, a ti. Tlungvel khuaa football tournament buatsaih thei tura hma latu Pi Lalhmingliani fakin Pu Lal Thanzara chuan a thawhrimna leh thahnemngaihna entawntlak a tih thu a sawi bawk.

Princess MIMI Football Tournament buatsaih nana senso tumtu Pi Lalhmingliani hi Germany rama Stuttgart a cheng a ni a. A hnathawh that leh nungchang mawi avangin an State-ah Princess atan vawihnih thlan a ni tawh. MIMI tih lampum hi Medical Improvement of Mizoram, India tihna a ni a. Pi Lalhmingliani hian Darlawng khuaah damdawia inenkawlna hmun, Emergency Clinic din a tum thu leh he tournament buatsaih pawh hi damdawi in dinna tur hmalakna peng pakhat a nih thu a sawi. Minister Pu Lal Thanzara hian Pi Lalhmingliani Audio CD leh Video CD bakah Benjamin Francis Nohro lehkhabu ziak “Mara Thuhlaril” a tlangzarh nghal bawk.

He football tournament ah hian team 18 telin an zinga team 5 te chu Tlungvel khaw chhung club te an ni a. Tlungvel Football Academy leh Darlawng GSA ten vawiin hian opening match hmuhnawm tak an khel nghal a ni.He tournament champion hian trophy leh pawisafai cheng 50,000 an dawng dawn a ni.

MFA President Pu Lal Thanzara hi MFA office bearer leh executive member-te’n an tawiawm a ni.