Vawiin chawhma khan Lunglei DC Conference Hall-ah District Development Coordination and Monitoring Committee (DISHA) chu Chairman Pu CL Ruala, MP Lok Sabha leh Co-Chairman Pu Ronald Sapa Tlau, MP Rajya Sabha ten an kaihruai a. Lunglei District chhunga central scheme hmalakna hrang hrang thlir hona an nei.

Pu C.L. Ruala chuan sawrkarin sum tam tak a seng a, chung sum chu dik taka hman a ni nge nilo endik tura meeting nei an ni tiin, theihtawpa tan kan chhuah chuan mipuiin hma an sawn in, Mizoram pawhin hma a sawn zel dawn a ni, a ti a. Pu Ronald Sapa Tlau pawhin kan rilru sukthlek thlak a tul tiin, ram changkang apiangten kuthnathawh an zahpui loh thu a sawi a ni.

Meeting-ah hian PMGSY hnuaiah kawng 5, km 51.39-a thui siam mek a nih thu tarlan a ni a, Swachh Bharat Mission (Gramin) hnuaiah mimal inthiarna – Individual Household Latrine (IHHL) 128 leh Swachh Bharat Mission (Urban) hnuaiah IHHL 50 sak zawh tih tarlan a ni. National Rural Drinking Water Programme (NRDWP) kaltlangin Marpara ‘S, Rangte leh Lungchem ah te Water Supply Scheme zawh fel a ni a, Pradhan Mantri Krishi Sinchayee Yojana (WD) hnuaiah cheng nuai 1363.5 dawn atanga cheng nuai 744.4 chu hna thawh nan hman a ni. Kum 2015-16 chhung khan Mahatma Gandhi National Rural Employment Guarantee Scheme (MGNREGS) hnuaiah ni 72 inhlawhna siam a ni a, Pradhan Mantri Awaas Yojana (Gramin) hnuaiah beneficiary 4308 thlan chhuah an ni. Heng zinga beneficiary 708-te hnenah kumin 2016-17 chhung hian insak tanpuina pek tur an ni a, PMAY-Urban hnuaiah beneficiary 4255 thlan chhuah tawh an ni bawk.

Nau nungdama piang (live birth), nausen pianghlim thihna (IMR) leh nau chunga nu thihna (MMR) te a tlakhniam thu tarlan a ni a. Lunglei District-ah Integrated Child Development Scheme hnuaiah project 4 – Lunglei, Hnahthial, Lungsen leh Bunghmun ah te kalpui a ni tih tarlan a ni. Midday Meal Scheme atangin school 28-ah kitchen-cum-store siam a ni a, zirlaite hnenah zirlaibu leh uniform SSA kaltlangin sem a ni. National Social Assistance Programme (NSAP) hnuaiah mi 5787-ten hamthatna an dawng mek a ni. Heng bakah hian Highway Division-IV hmalakna leh BSNL-in internet service tha zawk nei tura an hmalakna te tarlan a ni bawk.

Meeting ah hian bialtu MLA pali – Pu S. Laldingliana, Pu Joseph Lalhimpuia, Pu John Siamkunga leh Pu Chalrosanga Ralte an tel a, department official-te bakah Village Council member-te an tel a ni.