Rampum deng chhuak thihna maksak leh dangdai vawiin thlenga a finfiahna mumal la hmuh theih loh Arushi Murder Case leh 26th November 2009-a mifirfiak ten Mumbai-a pawikhawihna rapthlak tak an siam te chu vawiina I & PR Conference Hall-a Police hotuten Media training an neiha an zir ho langsar deuh te a ni.

Ni 15th May 2009-a Noida tleirawl Arushi tualthihna chhui a, belchianga NDTV tana thawk chanchinbumi tawn hriat ngah leh lar tak Arvind Uttam chuan a thil hmuh dan te a thlalak nen tarlangin vawiinah hian training hote nen sawihona hun tha tak an hmang zui a ni. Mumbai thil thleng thlalak leh media te kuthnu thahnem tak an en ho a, IIMC hotupa Prof. K M Srivastava’n heng thil pahniha media chetdan bakah police leh sipai ten media-a an landan chungchanga a thil hmuhdan leh an ngaihdan te zawtin sawiho hun an hmang zui a ni.

Sawihona hunah hian Mizoram IIMC Special Officer Pu LR Sailo chuan tunlai khawvela media thang chak tak um pha ve zel tura theihtawp chhuah a pawimawh zia tarlangin amah ngei pawh Director, I&PR kum 20 zet a hman hnuah pawh media lamah chuan “zirlai” ang chauh nia a inhriat thu a sawi a ni.

Ni 3 awh he training hi naktuk chawhnu lamah khar fel tum a ni a, kharna hun hman zawh hian IIMC mithiam leh training chhuak hlimte hian tualchhung chanchinbumite nen kawmna hun an nei zui dawn a ni.