2672/2022-2023
Dated Aizawl the 15th November 2022: Vawiin khan Taxation Auditorium, MINECO-ah Accelerating Startup Calibre & Entrepreneurial Drive (ASCEND) Mizoram Startup Workshop chu State Planning Board Vice Chairman, Pu H Rammawi chuan khuallian niin a hawng.

Hawnna hunah hian thusawiin Pu H.Rammawi chuan India sawrkarin mi retheite khaichhuah nan a ruahmanna a siamte chu ram dangte pawhin an awh leh an entawn thin a nih thu a sawi a, kalpui leh hlenchhuahna kawnga harsatna awm thin erawh chu a pawi takzet a ni, a ti Khawchhak ram hrang hrangte khawvela ber kai an nih theih chhan chu hruaitu leh mipuiten an tih tur theuh an tih vang a nih thu leh entawntlak a tih thu a sawi a. Lo neih a ni emaw sumdawnna kawngah pawh tihtur, tihdantur leh hlenchhuah dan hriat chu tangkai taka hman a nih theihnan a kawng pawimawh hmasa a ni , a ti a. Central sawrkarin program tha tak a duangchhuak chu Mizoram sawrkar aiawha lawmthu hrilhin, chhunzawm zel turin a ngen nghal bawk. University leh sawrkar department hrang hranga mithiamte kaihhruaina hnuaiah lo neia eizawngte leh entrepreneur-te chuan hna tam tak an neih theih thu sawiin, ram leh hnam tan an thawk tih inhre reng chunga kal zel turin a fuih a ni.

He hunah hian Planning & Programme Implementation Department Secretary, Pu Lalmalsawma Pachuau pawhin thusawiin State Planning Board chu Mizoram chhunga entrepreneur-te innghahna a nih thu leh entrepreneur-te suangtuahna a tak rama chantir chu workshop tum ber a ni, a ti a. Planning Department hnuaiah StartUp Hub din tura hmalak mek a nih thu sawiin, kalkhawm te chu tim lova hmalam pan zel turin a fuih bawk. Enterpreneur-te chu ram leh hnam tana rohlu leh midangte eizawnna siamtu an ni thei a, hun hlawk thlak tak hmang turin duhsakna a hlan.

Ni khat awh tur he workshop-ah hian Department for Promotion of Industry and Internal Trade (DPIIT), Planning Department, Mizoram University leh entrepreneurship-a mi hlawhtling tak tak ten hun an hmang dawn a ni.