ASEP General Assembly vawi 11 na “Nungcha Humhalhtute Inkhawmpui” tia vuah chu vawiin khan I&PR Conference Hall-ah hman a ni a, Pu Joseph Lalhimpuia, Parliamentary Secretary chu Khuallian a ni. He hunah hian Mizoram hmun hrang hranga ASEP member te bakah Solomon’s High School zirlaite leh nungcha humhalhna kawnga tui mite an tel a. Inkhawmpui hi ASEP President K. Lalmuansanga chuan a kaihruai a, inkhawmpui hi kum tin hman thin a nih thu leh ASEP hmalaknate Zoram mipuiten an tawiawm tha chho telh telh chu lawmawm a tih thu a sawi.

Khuallian Pu Joseph Lalhimpuia chuan, “ASEP hi hun rei tak atang khan ka lo hmelhriat tawh a, an hmalakna hi Zoram tan thil pawimawh tak a ni a. Ramngaw leh nungcha, environment humhalhna kawng tinrengah hian mipuite kan thanharh a tul hle a, kan chhehvel kan tibawlhhlawh lutukte hi nakin lawkah chuan harsatna nasa tak min la thlentu tur a nih dawn avangin tun atanga theihtawp chhuaha kan environment humhalhna kawngah hian tan kan lak a tul a ni. Khawvel hian environment pakhat kan intawm a, khawvel huap chuan ram kilkhawr tak niin lang mah ila ralbang thei kan ni bik lo. Kan ramngaw leh nungchate hi kan humhalh that phawt chuan khawvel ram changkang zawkte tan pawha tlawh chakawm leh ngaihven thamah Mizoram hi kan siam thei a ni,” tih thu sawiin, ASEP nen hian a theihna ang angah thawhho zel a inhuam thu a sawi.

Pu Lalhimpuia chuan nungchate humhalh hi Pathian rawngbawlna a ni a, nungchate nen in mamawh tawn kan nih piah lamah hlimna min petu an ni a, kan thiante an ni a ti a. An mahni khawngaih mai piah lamah an chenna turte, an ei leh in turte humhalh a ngai a ni a ti. Mizoramah hian ramngaw sg. km 15940 a awm a, chu chu Mizoram zau zawng atangin za ah 90.68 lai a ni a, chu ngawah chuan sava 640 vel an awm a, hengte hi kan humhalh an ngai hle a ni a ti bawk.

Assembly-a sem thin, environment humhalhna kawnga thawk tha mimal, khawtlang, zirna inte hnenah chawimawina hrang hrangte semchhuahna neih leh a ni a. ASEP chawimawina sang ber ASEP Nopui 2015 chu hun rei tak atanga an khaw ram chhunga sathar lo humhalh ngar ngartu Zote khua hnenah hlan a ni a. Tunah hian sathar chhungkaw hung tha tak 10-20 rual vel an awm mek a, kawngpui atanga hmuh mai theih hiala an humhalh hi a ropui a, kan ram tan a hla hlu telh telh dawn a ni. Chawimawina hian Citation leh belpui a keng tel.

Hemi bakah hian ramngaw humhalh tha Pachhunga University College leh Aizawl Theological College te hnenah chawimawina hlan a ni bawk a. An college campus-ah ngaw tha taka an humhalh hi Aizawl khawpui chuap hlu tak a nih avangin chawimawina hi hlan an ni. Environment lam thlalaka tui leh thawhhlawk Environmental Photographer chawimawina mi pahnih Lalnunthara Khiangte, Khatla leh Dina Aithur Chhakchhuak, Hnahthial te hnenah hlan a ni bawk.

ASEP hi kum 2005 khan din tan a ni a, an hmalakna avang hian Silai license nei 1 leh tualchher 7 surrender tawh an awm a, sairawkherh 2000 chuang leh thang chi hrang hrang 300 chuang surrender tawh an awm bawk. Mizoram hmun hrang hrang tlawhin awareness campaign neih thin a ni a, khaw 84 leh zirna in182 ah hlawhtling takin campaign a lo nei tawh a ni. Sapel hratte hnena sim tura ngenna lehkha thawn chhuah te, Camera hmanga sava vehna programme neih te, Social Media facebook kaltlanga inzirtirna neihte hi ASEP hmalakna langsar deuh dangte a ni. Tunah hian member 300 chuang zet rampum huapin an awm mek a, khaw 10 ah branch din a ni tawh a. Member ni duhte tan Rs. 50/- membership fee pe-in nih theih a ni.