Vawiin khan Vanapa Hall ah Art & Culture Department bultum in Begum Akhtar 100th years Anniversary celebration hman a ni a.Pu R Romawia Art & Culture etc Minister in a hmanpui a.Programme hlimawm tak bakah Pi Begum Akhtari chanchin sawi leh Video te thlir hovin hun hman a ni.
Ministry of Culture,Govt.of India in Pi Begum Akhtar,Queen of Ghazal ti hiala an koh kum 100 na lawm tura an ngenna, hun rei tak atanga an lo buaipui tawh ti puitling theia an awm chu lawmawm a tih thu Khuallian Pu R Romawia chuan sawiin Pi Begum Akhtari hi a piancham dik tak chu 7 October 2014 kha a ni a, mahse Central sorkar atanga sum hmuh a remchan mai loh avanga vawiin a hmang an nih dan leh Pi Begum Akhtari piancham lawmnaah hian thupui ah ‘ Unity through Culture ‘ thlan a nih thu leh hei hian hnam ze hrang hrang ,thu leh hla hmanga insuihkhawm tir a tum ani a ti a. Sawrkar laipuiin India hnam pum Ghazal hmanga min insuihkhawmtir a tum ang hian Mizorama cheng, hnam hrang hrang te hian zai leh lam kan neihte hmang hian thianah insiam tawn tum ve ila, Ghazal zai hmanga Pi Begum Akhtar in India ram puma hriat a hlawh thei ang hian Mizo te pawh in kan pi leh pute zai chi hrang hrang hmang in India mipuite hriat hi kan hlawh thei ani tih hria in zaimi leh hla phuahthiam ten hei hi chonaah ngaia, an thiam an theihna hmang chhuak thiam tur in a sawm nghal a ni.
Art & Culture Department chu Department lian lo tak ni mahse an hmalakna a zauvin ramri chin pawh an nei lova, chutichunga pipu te sulhnu hrang hrang humhalh leh chawinunna kawnga an thawhrimna leh hlawhtlinnaah te fakawm a tih thu sawiin, Minister chuan Hnam nun sawprawp theih na tur laka fimkhur a ngaih thu leh ‘Moral Reformation ‘ngaih pawimawh a tul ani tiin kan rilru in western lam nun a lo ngaihven deuh anih pawh in kan pi leh pute culture, incheina leh zai leh lam te a hlamchhiah tur a ni lovin a chawi nung zawk tur ani a ti.
Pu R Hmingthanzuala ,Director, Art & Culture kaihhruai vawiin programme ah hian Pu Lalchuailova,Museum Curator,Mizoram State Museum chuan Pi Begum Akhtari chanchin a sawi a,Mizo zai hrang hrang leh Indian classical Music leh Ghazaal te ngaihthlak a ni.
Pi Begum Akhtari hi a hming dik tak chu Akhtari Bai Faizabadi a ni a,Indian Singer lar tak niin Hindustani Classical Music a Ghazal,Dadra leh Thumri te hi a larna a ni a. Vocal Music ah Sangeet Natak Academi Award a dawng a, a thih hnu ah India sorkar in Patma Shree leh Patma Bhusan chawimawina a pe bawk.A aw chhuak reng reng mai chu a tha chungchuang in midang tan pawh a zai dan copy hleihtheih loh khawpin a chungnunga a. Hla zali chuang lai neiin All India Radio luah lumtu a ni reng thin. Ama style in Ghazal hla te a sa thin a, a hla tam ber chu Raag kalphung a ni ber.Kum 60 mi niin 30th October,1974 khan a thi a, a thlan hi Lucknow khaw chhunga Pasandra Bagh hmunah sailungvar leh leirawhchan sen a siam a ni a,China Bazar an tih hmunah a pual in Museum ( Open Air Museum ) siam tum in hma lak mek a ni.
