Vawiin khan Champhai District chhunga pipu sulhnu enfiiah a lo zin mek Archeological Survey of India Director General Pu Rakesh Tiwari chuan Lungphunlian khua a pipu sulhnu a enfiah. Pu Rakesh Tiwari hi Superintendent of Archeological Survey of India in a tawiawm bakah INTACH Mizoram Chapter atangin Convener Pu P. Rohmingthanga IAS (Regd) leh Co-Convener Pu Ringsanga IAS (Regd) bakah media miten an tawiawm a ni.

Lungphunliana a pipu sulhnu Lungphun lian tak takte chu a pianken tidanglam lo tur leh tihmelhem lo tura chahin, Pu Rakesh Tiwari chuan, Archeological Survey of India in National Importance a puang tur chuan heng pipu sulhnute hi a lo berah kum 100 tal a nih atul thu a sawi a. INTACH Mizoram Chapter in heng Pipu sulhnu humhalh tura a thlanchhuahte hi a hmun ngei a endik atul vanga lo kal anih thu leh heng sulhnu hluite hi chawpchilh a chhe mai thei anih loh vangin vawn that leh humhalh that tum luat avanga khawih danglam miah loh tur a nih thu a sawi bawk.

Pu Rakesh Tiwari chuan Lungphunlian khawdai a lungphun a milem then khatte tihfiah tuma lungker belh hnuhma a awm chuan a pianken dik tak hlutna a hloh phah thu sawiin, khawchhak tlangdunga pipu sulhnute chu chik zawk a enfiah zel anih tur thu a sawi a ni.

ASI Director General leh amah tawiawmtute hian Vangchhia khawdai a Kawtchhuah Ropui leh Lianpui khua a Zo kawtchhuah a pipute sulhnu a lo enfiah tawh a ni.