Nimin khan Food, Civil Supplies & Consumer Affairs Minister Pu John Rotluangliana leh Indian Oil Corporation (IOC) hotu thenkhat te chuan Mizoram House Silchar ah inkawm ho na an nei a. He inkawm ho na ah hian IOC lam atangin Pu J.K. Brahma, Senior Area Manager LPG; Pu R.K. Mohan Singh, Senior Retail Sales Manager leh Pu Lalit Kumar Doley, Chief Plant Manager, Indane Bottling Plant, Borkhola te an tel a. Minister hi Mizoram House, Silchara Deputy Resident Commissioner in a tawiawm a ni.

Supply Minister Pu John Rotluangliana chuan furpui liam ta leh Rel kawng zauh hna avanga Mega block chhunga harsatna lutuk awm lova Mizorama LPG leh POL, IOC lamin an rawn pek avang te in lawm thu a hrilh a. Thal chho leh Krismas leh Kumthar lo thleng turah Mizoramin tuialhthei leh eirawngbawlna gas lamah harsatna a tawh loh nan theihtawp chhuaha tan la turin a ngen a. Minister chuan Mizoram ah Oil Depot hmantlak a awm loh avangin thil engemaw thleng hlekah tuialhthei control ngai hial khawpin kan harsa nghal a, a rei deuh phei chuan kan nghei ti tih zel mai, a ti a. He harsatna sutkian dan kawng awm thei se tiin a duh thu a sawi a. Mizoram hmun hrang hranga LPG Distributor leh POL Retail Outlet-te a tam zawk hawn theih nise tiin rawtna a thlen bawk.

IOC hotute pawhin Mizoram nen thawhho na a tluan avangin lawmthu an sawi a, a theih anga thaa mipui mamawh rawn pek zel an tum thu an sawi bawk. Borkhola LPG Bottling Plant ah gas dahkhawlna lian zawk 60,000 Metric Tonne dawng thei chu November 2015 thla chhunga hawn an tum thu sawiin hawn anih hnua Mizoram chuan eirawngbawlna gas hnianghnar zawkin a dawng thei dawn a ni, an ti.