Vawiin hian Lawngtlai DC Conference Hall ah Lawngtlai District National Sanitation Campaign Swachh Bharat Missions (Gramin) Closing Function neih a ni a, Addl DC Pu R. Lalsangluaia chu khuallian a ni.

Khuallian chuan faina leh thianghlimna tello chuan hausakna, hmuingilna leh damreina ten mihring nunah hna a thawk thei lova, chung thil thate chu neih kan duh a nih chuan kan faia kan thianghlim a ngai a ni, a ti. Lawngtlai District ah Naupiang hlim boral zat a la tam avangin kan dinhmun chu a tha tawklo a ni tih hai rual a ni lova, thianghlimna lama hmasawn turin mitinin mawhphurhna kan nei a ni, a ti bawk. Khuallian hian Faina chungchanga Higher Secondary School Level Debate buatsaiha tithate hnenah lawmman a hlan nghal bawk a ni.

Closing Function hi Sr. EE Pu Ngentluanga, PHE in a kaihruaia, National Sanitation Campaign chu a hmingin kharna nei mahila, hna tak tak chu kan thawk tan mek zawk a ni, a ti.

He inkhawmah hian Pu Lallawmpuia Sawthly, SDO PHE chuan faina lama kan la hniam zia leh hmasawnna tur a la tam zia sawiin 2012 baseline Survey atanga a lan danin Lawngtlai Districta chhungkaw 35% velte chuan ekin mumal kan la neilo a ni a ti. He programme hnuaiah hian kumin sawrkar kum chhungin khaw 13 a chhungkaw 780 te chu ekin sak sak hman tum a ni a, Bawlhhlawh paihna tha (Solid & Liquid Waste Management) tur khaw 3 tan siam sak hman tum a ni bawk.

He Campaign chhung hian faina inzirtirna beihpui thlak a ni a, Lawngtlai Bullet Club te nena tangkawpin Faina Rally te neih a ni a, Live Telecast Debate te neih a nih bakah thingtlang khaw thlan bik 5 ah Faina Campaign neih a ni a, la nei zel tura ruahmanna siam a ni bawk.

Attachment

  • Loading attachment...