193/2023-2024

New Delhi, 24th April, 2023 : Health Minister Dr R.Lalthangliana chu vawiin khan Asia Pacific Leaders Conclave on Malaria Elimination, Hyatt Regency, New Delhi-a neih ah khual zahawm (Guest of Honour) niin a tel a, he leaders conclave hi Dr.Mansukh Mandaviya, Union Health Minister kaihhruaina hnuaiah neih a ni.

Union Health Minister-in Dr R. Lalthangliana he Conclave a tel tura a sawmna chhan hi Malaria umbo-na kawngah Mizoram chu India ram chhunga state hnathawk tha berte zinga mi a nih avanga Mizoramin hma a lo lak tawh dan te sawi lang tura beisei a nih vang a ni.

Khualzahawm a nihna angin Dr.R.Lalthangliana chuan Conclave ah hian thu sawiin, Mizoram chhunga Health Department hnuaia district then hran pakua te zing a panga chu Malaria umbo mai thei dinhmunah a ding tawh a, chutih rualin district pali - Lunglei, Lawngtlai, Mamit leh Siaha district ah te hian Malaria vei kum tinin an la awm thin a, hmasawnna chak zawk kan neih theih nan National Vector Borne Disease Control Programme(NVBDCP), New Delhi kaihhruaina hnuaiah Mizoram Sawrkar chuan hma chak takin a la mek tih a sawi a, a bikin Malaria tamna hmun district pali ah chuan IRS (DDT kah), LLIN(Thosilen chiah sa) sem leh IEC/BCC activity hrang hrang, state leh district task force bakah NGO leh kohhran pawl hrang hrang te nen tang hovin theih tawp chhuah a hmalakna kalpui mek a ni a ti bawk. Mizoram chu Malaria vei hmuhchhuah kawngah India ram chhung a thisen exam rate sang ber a nih thu leh sub-centre awmlohna khua-ah pawh khawtinah Malaria vei hmuhchhuah tuma hma lak a nih thin thi leh malaria veite enkawlna pek vek a nih thu a sawi.

"Asia Pacific Leaders’ Conclave on Malaria Elimination" hi Ministry of Health & Family Welfare, Government of India leh Asia Pacific Leaders’ Malaria Alliance (APLMA) tangdunin an buatsaih a ni a. He hunah hian Indonesia, Malaysia, Solomon Islands, Fiji, Cambodia, Sri Lanka, Nepal, Thailand, Myanmar leh state thenkhat atanga Minister leh palai kalten thu an sawi a. WHO, Niti Aayog, ICMR leh khawvela Malaria do kawnga pawl lian tak tak te an tel a ni.

He Asia Pacific Leaders Conclave on Malaria Elimination-ah hian Dr.Chawngthanchhunga, Jt.Director, Malaria; State Programme Officer (SVBDCP) chu sawm a nih angin a tel a, Dr. Hmingthankimi, OSD (Health), Mizoram House pawh a tel bawk a ni.