194/2023-2024

Mamit 24th April, 2023 : Vawiin khan DC Office, Mamit Silver Jubilee lawm a ni a. He hunah hian Pu Nghaklianmawia, MCS (Rtd), Mamit District Bawrhsap hlui chu khuallian a ni.

Khuallian chuan Mamit District DC ka nih lai khan mi District-in an tih theih chuan kan ti ve thei tur a ni tih rilru puin hna kan thawk thin a. Tuna kan DC leh a thawhpuite pawhin khatiang rilru, neitu rilru puin hna an thawkin ka hria a, ka lawm em em a, an chhunzawm zel ka beiseiin duhsakna ka hlan a ni a ti.

Mamit District chu Aspirational District a nih angin District hmasawnna tur atana thawktute pawh a tha hlang awmkhawm inni tiin District hmasawnna tur atana theihtawpchhuaha hna thawk turin a chah. Mamit khua chu lawm nachang hria leh hmasawnna ngaina tak khua an nih thu sawiin tanrualna leh inlungrualna nen tha taka thawkho zel turin kalkhawmte chu a chah bawk.

Pu Vanlalngaihsaka, IAS, Mamit DC hlui, MPSC Member ni bawk chuan Mamit DC Office Silver Jubilee lawmna-a a tel thei chu lawmawm a tih thu sawiin Mamit District Bawrhsap tum 2 leh SDO (S) a lo nih tawhna te avangin Mamit-ah a mikhual loh thu leh District hmasawnna tura tha taka hna thawk zel turin duhsakna a hlan.

Pu H. Lalchamliana, Mamit DC Office-a Circle Assistant - I (Rtd) chuan Mamit-in District Headquarter a hmuh dan chanchin chipchiar takin a sawi.

He hunah hian a duh apiangte tana thusawina hun hawn niin Pu Vanlalchhuanga Chhangte, President, Sub Hqrs. YMA, Mamit bakah midangte'n thu an sawi bawk.

Mamit District hian Kum 25 chhung hian, DC 17 nei tawhin Kum 1998 vawiin ni angah hian Pu Z. Lalhmingliana, MCS hovin DC Office, Mamit Hmar Veng a mi hi luah tan a ni.

DC Office Kum 25 tlin lawmna hi hun hniha then niin Session-I hi DC Conference Hall-ah neih a ni a. Pu V.L. Remliana, Mamit District Bawrhsap chuan he hun hi kaihhruaiin kalkhawmte lawmna thu a sawi a. Pi Sapliannguri, Superintendent, DC Office Mamit chuan lawmthu a sawi bawk.

Chawhnu hun Session-II hi DC Office kawt zawl-ah hman chhunzawm niin hnam lam GHSS, Mamit leh Govt. M/S -III te'n entirin zaithiam zai ngaihnawm tak tak ngaihthlak a ni a. Jubilee lawmna ruai kilho nghal a ni.