August ni 18-26 2019 inkara neih Asia Pacific Youth Exchange (APYE), South Korea a neih chu a tiak ta a, Mizoram atanga thalai thlanchhuah 13-te chu an che tha hle a. Dr. Vanlaltanpuia, Chairman, Mizoram Youth Commission chuan Mizo naupangten hetiang result tha an rawn hawn thei hi a lawmawm tiin Mizoram Sawrkar in Mizoram thalaite hmakhua ngaia, an thiamthil te ramdanga phochhuahna hun a siamsak naa lawmthu a sawi a ni.

APYE hi site thum ah then a ni a; Ansan, Daegu leh Seoul site-ah te zirlaite kalkhawmte chu tirhchhuah an ni a, hetah hian "Multiculturalism" thupui hmang in an site kalna ah hian zirbingna an nei a ni. Site pathum atang hian team-2 zel te chu top-6 ah thlan chhuah an ni a, Mizoram atanga thalaite telna team 5 te chu top-6 ah lang pha in 'Socio emotional development for multicultural children in S.Korea' tih thupui hmangin Seoul site atangin Jenny Lalmuanpuii telna team chuan lawmman pakhatna an la a, Daegu site atangin Christopher Lalthazuala telna team chuan 'Migrant Women Expertise Training' tih thupui chuan lawmman pakhatna a la bawk a ni.

Ni 26.08.2019 Khan Hanyang University, Seoul Campus-a judge te hmaah team hrang hrangte hian Local Immersion site a an thil zirchhuahte chu phochhuakin, an present hlawm a. Mizo telna team pahnihte chuan pakhatna dinhmun an hauh thei a ni. APYE S. Korea ah hian ram hrang hrang atang thalai 150 vel an tel a, heng zingah hian Mizoram thalai te hi a langsar pawl an ni thei zel a. APYE Korea 2019 kharna hi Hanyang University-ah neih niin, Cultural Night a khar a ni a, hetah hian Mizoram atanga kalte hian Chai an entir a, kalkhawm ten an hlut hle ani.

Nakum lamah APYE India Mizoram-a thlen a nih ngei theih nan MYC, Rochun leh MZU te nena thawh ho a, hmalak zel tum a ni.