Chief Minister Pu Zoramthanga chuan nimin khan sawrkar laipuia Minister of State for Health and Family Welfare Pu Ashwini Kumar Choubey chu a chenna inah a kawmin mipui hriselna in hma a sawn theih nana hmalakna hrang hrangte an sawidun.

Chief Minister chuan Mizoram sorkarin mipuite hriselna a ngaihpawimawh thu leh theihtawpa hma a lak thu a sawi a. Zoram Medical College chungchang sawiin mamawh tam tak a awm thu te, sorkarin he Medical College hi  tihchangtlun zel tumin hma a lak mek thu leh  Speciality Hospital tal ni thei se duhthusam a ni tih sawiin hemi atan hian sorkar laipui tanpuina a ngen nghal bawk. Chief Minister chuan tunhnaia district hawn thar pathum - Hnahthial, Saitual leh Khawzawl tan District Hospital changtlung tak din thuai a ngaih thu a sawi a. Zoram hmun hrang hranga Hospital, Community leh Primary Health Centre te chu tihchangtlun zel a tul thu a sawi bawk. Mamit District chu Aspirational district a nih angin Mamit District Hospital chu ngaihpawimawha khum 200 tal awm thei tura thuam that a tul thu a sawi a. Hengte hi Pu Choubey chuan a lo enzui tur thu hrilhin amah ngei Mizorama lo zin thuai a duh thu CM a hrilh a. Mamit District tan Mobile Medical Van pariat (8) pek tum a nih thu a sawi bawk.

Chief Minister hi State Planning Board Vice Chairman Pu H.Rammawi leh official dangten an tawiawm a ni.