Mizoram Director General of Police  Pu  SBK Singh chuan zan khat riakin  Champhai a tlawh a. Vawiin khan Champhai Police Station a kumtlinglo thubuai neite dah lailawkna tur pindan 'Children's Corner' a hawng a.He mi hnu hian Champhai Police Station Conference Hall-ah Police te fuihna thu a sawi bakah   tlawmngai pawlte a kawm bawk. Mizoram Director General of Police (DGP) Pu SBK Singh (IPS) hian nimin lam khan Indo-Myanmar Border Trade Point  tlawhin  ramri a insumdawn tawnna a lo enfiah  tawh bawk a ni.

DGP chuan Champhai Police Station a Children's Corner hawn hian mitinte dikna chanvo humhim anih zia a lantir a ni a ti a.  Champhai chu khualzin mite tana hmun nuam leh theihna nasa tak nei a nih thu sawiin, khualzin hipna tura tan la tur leh  kaihruai a, humhim turin abik a duan Tourist Police awm thei se tha a tih thu a sawi a. Pu SBK Singh chuan Indo-Myanmar Border Trade Point nihphung dik tak a hmun ngeia hmuh leh ram pahnihte intlawh pawhna kawnga Police tihtur leh chanvo zirchian anih thu a sawi a.  Ramri a ram pahnihte inlaichinna tha tak awm chu lawmawm a tih thu leh dan ang taka mumal zawka chetvelna a awm a, venghimtu thuamchak leh Lirthei dahna mumal zawk awm a tul thu a sawi  a.
 
DGP chuan ramri kana suahsualna hrang hrang thleng thei te ven kawngah  dan leh thupek lekkawhtu Police-te bakah hnam tanrual a pawimawh thu  sawiin,  ram leh khawtlang himna tura mahni chanvo theuhah thatawp chhuah thei turin mimaltinte invawnthat a tul hle a ni, a ti a. Ramri hrula awm Police-ten ruihhlo, ralthuam leh dan lova lut bungraw danbeh chu hnapui bera nei tur leh ngaih pawimawh  ber ni thei se a duh thu a sawi bawk.