New Delhi-a cham mek Chief Minister Pu Zoramthanga chuan vawiin khan Union Minority Affairs Minister Pu Mukhtar Abbas Naqvi chu a chenna inah a kawm a; Mizoram mamawh hrang hrang an sawidun.

Chief Minister chuan sawrkar laipui hmalakna pakhat Prime Minister's Jan Vikas Yojana chuan Mizoram huam tel ve se a duh thu a thlen a. He Scheme hnuaiah hian hnam tlem zawk leh hnuaihnung zawkte tan ei leh bara an intodelhna tur leh nunphung changkang zawk an neihna tura zirna, hriselna leh eizawn thiamna (skill development) tihhmasawn te a tel a ni.

Union Minister chuan CM rawtna anga Jan Vikas Yojana hnuaia Mizoram telh ngei chu tha a tih thu leh Nagaland leh Meghalaya te pawh huamtir tha a tih thu a sawi a. Hei bakah hian Mizoram atanga Central Service Exam tura inbuatsaih duhte tan coaching centre changtlung tak din leh Coaching centre awm tawh saa Mizote an luh theih dan turte an sawidun bawk. Pu Mukhtar Abbas Naqvi chuan rawtna mumal tak siama a hnena theh lut thuai turin Chief Minister chu a hrilh a ni.

CM Pu Zoramthanga hi Pu H.Rammawi, Vice Chairman, State Planning Board leh Resident Commissioner ten an tawiawm a ni.