Ni 16-25 July, 2011 chhunga Asian Karate Federation (AKF) huaihawta China-a 11th Asian Junior and Cadet Karate Championship neihnaa India aiawha Junior -55 Kgs-a khel turin All Mizoram Karate Association (AMKA) Player, Aizawl Chanmari West rawlthar Vanlalthanpuia S/o T.C.Lalremsiama chu ni 19.7.2011 khan China a thlawk lut ta.

Vanlalthanpuia hi All India Karate-Do Federation (AIKF)-in 28.5.2011-a New Delhi-a a buatsaih selection lo paltlang tawh kha a ni a; Vanlalthanpuia ruala selection ti ve tho, Indian Reserve Player atana  dah, a hnu deuha an rawn thlan fel leh hnuhnawh Mizo rawlthar pakhat AMKA Player J.Vanlalenkawla S/o J.Lalroliana, Saiha College Veng erawh chu Indian Passport a thehluh hma hman loh avangin India Team hotuten Visa an buaipui felsak hman lo a, a kal ve thei ta lo a ni. J.Vanlalenkawla ang bawka Indian Passport an khawtlaipui avanga Visa nei hman ta lo hi Indian National Karate Team zingah hian an awm ve nual nghe nghe a; J.Vanlalenkawla hi India Team zinga beiseiawm ber pawl a nih  avangin AMKA hotute chuan uiawm an tiin pawi an ti hle tih an sawi.     

11^th Asian Junior & Cadet Karate Championship hi Qiaoxiang Gymnasium, Quanzhou City of Fujian, Chinaah khelh tur a ni a; date 22.7.2011 hian tournament khelh tan tur a ni a, hemi hma lam hian Technical Seminar, AKF Referee/Belt Exam, etc. an ti ang. Vanlalthanpuia hian ni 22.7.2011-ah a khel ang a; tum lawk ang chuan ni 27.7.2011-ah Aizawl a lo thleng leh ang. AMKA General Headquarters General Secretary Pu T.C.Lalremsiama chuan Vanlalthanpuia hian hnehna a chan theih nan, Mizo mipui leh Kohhranhoin Pathian hnenah min tawngtaisak turin kan ngen lawm lawm a ni a ti.

Vanlalthanpuia hian Gov’t. Chaltlang HSS, Aizawlah Class-XII a zir mek a, kum 2009 khan Karate-a amah zirtirtu Pu C.Dosavunga hnen atangin Black Belt 1^st Dan Degree a lo dawng tawh a; State/Regional/National Level Championship-ah Medal engemawzat lo hlawhchhuak tawhin, National Coach te bakah Italy, Iran leh Dubai Coach tha tak tak te hnen atangin Training pawh a lo dawng ve tawh thin nghe nghe bawk a ni.