Vawiin khan NABARD huaihawtin Pre-Potential Linked Credit Plan (PLP) meeting neih a ni a. He meeting NABARD Regional Office Conference Hall, Bawngkawn-a neihah hian Mizoram-a Bank hrang hrang - State Bank of India, Mizoram Rural Bank, Mizoram Cooperative Apex Bank, IDBI, AXIS, UBI, Syndicate leh NeDFi te bakah Mizoram sorkar hnuaia department kaihhnawih Industries, PWD, PHE, MIFCO leh All Mizoram Farmers’ Union (AMFU) leh tlawmngai pawl dang aiawhte an tel a ni.

Pre-PLP meeting-ah hian NABARD Dy. Manager Pu F.R. Marak chuan kum 2010-2011 chhunga an hmalakna leh hlawhtlinna te a tarlang a, 2011-2012 chhunga an hmalakna zel tur leh ruahmanna an siam dan te a sawilang bawk.

NABARD Regional Office, Mizoram, General Manager Dr.P.M.Ghole chuan kum tin District zawng zawnga an hmalakna tur project siam thin a nih thu a sawi a, hemi tihchangtlun zual nan Bank, sorkar department leh NGO te thlawpna tha zawk an mamawh a ni, a ti. NABARD-in Project leh kum tawpa Report uluk taka an siam  chu Planning Commission hnenah thehluh vek a nih thin avangin an hmalakna atangin Planning Commission pawhin state tin te tan tanpuina ruahman dan an siam thiam zawk phah thin a ni, a ti bawk. Dr.Ghole chuan  NABARD-in Plan a siam hmain a thawhpui tur Bank, sorkar department leh NGO atangin rawtna leh an hmalakna chungchang chipchiar taka sawiho leh inrawn a, kum thar atan Plan felfai zawk siam an duh thu a sawi a. Vawiina meeting-ah hian Mizoram District tinah NABARD hnuaia hlawhtlinna hrang hrang leh an hmalakna tur thar te sawihona hun tha tak an neih theih chu a lawmawm hle a ni, a ti.

Mizoramah hma an lo lak tawh atanga chona thar tam tak an hmu zel thu sawiin Dr.Ghole chuan a bik takin buh leh thlai chi ah intodelh zawk a tul thu leh thingtlang loneih dan (jhum cultivation) tihrem kawngah te hian tan lak a ngai a ni, a ti a. India Prime Minister-in rampum buh leh thlai dehchhuah chu 4% tala tihpun a tul thu a sawi tawh angin NABARD pawhin lonei leh a kaihhnawih eizawnna hrang hrangah tun aia dehchhuah a tam zawk theih nan theihtawp chhuah a tum a ni, a ti a. Sorkar laipui chuan Rural Infrastructure Fund (a bik takin warehouse) atan cheng vaibelchhe 2000 a ruahman tawh a, chu chu NABARD pawhin hmang tangkaiin Mizorama loneituten an mamawh em em storehouse tam zawk din an tum thu a sawilang bawk. Nikuma NABARD hnuaiaPiggery Development scheme an tan tawh chu a hlawhtling hle a, hemi hnuaiah Mizoram Rural Bank ringawt pawhin vawkvulh mi 4000 chuang hnenah tanpuina a pe nghe nghe a ni tih a sawi bawk. Loneimite hmasawnna tura project leh scheme hrang hrang tihhlawhtling zel turin tan i la theuh ang u tiin Dr.Ghole chuan Bank, sorkar department leh NGO te a sawm nghal bawk a ni.