Vawiin Chawhma dar 10:00 khan Govt. Champhai College Seminar Hall-ah ni 10 awh tur PMEGP hnuaia Beneficiaries ten EDP Training an nei a,  Mizoram KVI Board Chief Executive Officer, Pu Tinkhandala chu khuallian a ni.

He inkhawm Pu C. Vanlalruata, DVIO, Champhai District kaihhruaiah hian thusawiin khuallian Pu Tinkhandala chuan KVI in kan thil tum ber chu hna nei lo ten hna an neih theihna tur atan a ruahmanna siam sak an ni a ti. Mizoramah KVIC, MKVIB, DIC ten Industry a tui mite tanpui hna kan thawk thin a, Aizawl khawpui bik hi Municipal Council a lo din tak avangin  DIC kut a ni ta bik a, keini MKVIB te hi kan hming ang takin thingtlang lam kan huam bik dawn ta a ni a ti. CEO chuan Industry dinna atan hian Sawrkar in sum a seng hnem tawh hle a, mahse kan beisei ang hlawhtlinna erawh kan hmu tlem hle a ni a ti a, tunah hian Industry hi din hlawhchham mah ila kan tu leh faten an la rawn tihlawhtling dawn tho tho a ni a ti. Industry tel lo chuan ram a hmasawn thei lo a, hmasawn turin Industry tha kan neih a pawimawh a. Tunah hian Industry lian din thei hrih lo mah ila kan phak tawka kan din ang chhun chhun te taima taka kan enkawl a tihtak zet a kan thawh chuan kan ti puitling ngei dawn a ni. Industry hian kalphung a nei a kan thil siam chhuah man atanga 15% hlepa hralh turah kan ngai a, mahse Mizote hian a man kan chhiar to thin lutuk avangin a market lamah harsatna kan nei leh thin a ni a ti.

Khuallian chuan Agriculture leh Horticulture atanga kan thlai thar chhuah te hi Industry hmanga sawngbawl a nih loh chuan rei tak a dahthat theih loh a. A thlai chin a kha Industry ni lo mahse a sawngbawl a kha Industry a ni vek a ni a ti a. Tung chungchang sawiin tunah hian Saitual leh Zemabawkah a herna khawl kan nei a, Tung rah khehsa kg 1 Rs. 10 in engtik lai pawhin kan lei duh reng a ni a ti. Mizoram hi India ramah Tung Oil her chhuak awmchhun kan ni a, kan tharchhuah ang ang te pawh India ram Company lian ten an inchan lo nasa hle a ni.  India rama Tung Oil kan hman zawng zawng hi China ram atanga an lakluh a ni a, chuvangin Champhai District hian uar taka Tung lo ching turin ka chah duh che u a ni a ti.

He EDP Training hawnna inkhawmah hian Govt. Champhai College Principal Pu Lalnunmawia pawhin thu a sawi a, Chairman Pu C. Vanlalruata chuan kum 2008-2010 chhungin PMEGP hnuaiah mi 9 hnenah Bank kaltlangin Loan pek an ni a, kum 2010-2011 chhungin mi 28 hnenah pek an ni leh a ti. Pu K. Lalramlawma JEI in lawmthu a sawiin meeting hi a tin a ni.