No.3525/2021-2022
Aizawl 29th December, 2021 : Vawiin khan Shri Umakant, IFoS Central Prabhari Officer/Jt Secretary, Department of Land Resources, Watershed Management Division, Govt. of India chuan Aspirational District Mamit a tlawha, Pu Lalmalsawma Pachuau, State Prabhari Officer chuan a tawiawm bawk.

Meeting hi Dr. Lalrozama, IAS District Bawrhsap chuan kaihruaiin Mamit District tlawhtu Central Prabhari Officer leh State Prabhari Officer te chungah lawmthu sawina thipek pein Aspirational District Mamit in hmasawnna hmel a hmuh ngei theihna tura hmalak pui zel turin a sawm bawk.

Shri Umakant chuan hrileng avangin duh anga Mamit District a tlawh theilo hnu-ah khawtlang hruaitu, tlawmngai pawl leh Department Officials te nen meeting-na hun tha tak an nei chu lawmawm a tih thu a sawi a. Aspirational District Mamit in hmasawnna a hmuh theihna tura District Bawrhsap leh Department dangte hmalakna avanga tehfung hrang hranga kan (Ranking) dinhmun chu a lawmwm thin thu a sawi. Kan District hnufualna lak ata chhanchhuah kan nih theihna tura theihtawp kan chhuah tlan erawh a tul hle a, Mamit District-in hmasawnna tluatling a neih theihna turin kawng, eng leh inbiakpawhna signal tha chu ngaihpawimawh a tul thu sawiin District-in harsatna a neihte chinfel a nih theihna tura Aspirational District Mamit chu tlawh a nih thu a sawi bawk.

Pu Lalmalsawma Pachuau, State Prabhari Officer pawhin Mamit District-in hmasawnna an hmuh theihna tura thawktute thahnem ngaihna a lawmawm thu sawiin tan la zel turin a chah bawk.

He hunah hian Pu Beitlotha Nohro, Aspirational Branch Officer, Mamit chuan Mamit District dinhmun Aspirational District kan nihna atanga khaichhuah kan nih theihna tura Central Sawrkar atanga tanpuina kan dawn dan bakah hmasawnna leh kan hniamna lai hrang hrangte leh hmalak tawh dan leh hmachhawpte a lem nen entirna a nei.

India rama District hnufual thlanchhuah 115 atanga thlan Mamit District-ah hian mihring 86364 (2011 census) niin Mizo, Bru ( Reang) leh Chakma an cheng a. Literacy rate hi 84.74% a ni. Aspirational Programme hi kum 2018 June thla atang khan kalpui tan niin hemi kum July thla tehfungah hian Mamit District hi 94-na niin kumin 2021 October thla khan overall-ah 8th Position ah a in hlangkai a ni. Tehfung hrang hrangah hetiang hian hlawhtlinna lo hmuh ni tawhin April 2019-ah 1st Education, October 2019-ah 2nd Overall, January 2020-ah 5th Overall, July 2020-ah 2nd Overall, October 2020-ah 3rd Overall, August 2021-ah 14th Financial Inclusion & Skill Development, September 2021-ah 10th Basic Infrastructure, October 2021-ah 8th Overall-ah te hlawhtlinna lo hmuh tawh niin heng ranking hrang hrang atanga hnathawh that avang hian Incentives Awarded 16 crore hmuh a ni dawn a. Project Proposal pawh Niti Aayog ah thawn a ni tawh a ni.

Kalkhawmte atangin District hmasawnna tur hrang hrang sawihona neih zui nghal a ni a. Khawtlang hruaitute'n rawtna an neihte CPO hnenah hian an thlen bawk a ni.

Central Prabhari Officer hian Mamit khawpui chhunga Anganwadi Centre thenkhat a tlawh nghal a ni.

He hunah hian Mamit khawpui chhunga hmasawnna hnathawktu Department hrang hrang, Tlawmngai pawl YMA, MHIP leh khawtlang hruaitute an tel a ni.