No.3524/2021-2022
Dated Aizawl, the 29th December, 2021: Vawiin khan Thinglian khua chuan an mual (playground) ah buh leh thlai thar kutpui an buatsaih a. Bialtu MLA, Deputy Speaker ni bawk Er. Lalrinawma chuan khuallian niin a hmanpui.

Er.Lalrinawma chuan, Thinglian khawtlangin buh leh thlai thar kut buatsaih thei khawpa malsawmna an dawng chu lawmawm a tih thu sawiin khaw taima leh thawkrim tak an nih zia a langfiah hle a ni, a ti a. Covid hri leng lakah vawiin thlenga Thinglian khua an la him theih zarah mipuiten hna kan thawk thei a, kan thawhrimnate Pathianin malsawmin vawiinah kan thawhrim rahte hlim takin kan lo lawm thei ta niin ka hriaa, Thinglian khawtlang ka lawmpuiin ka chhuang hle a ni, a ti.

Bial a enkawlnaah eizawnna tihhmasawn chu a ngaih pawimawh ber te zinga mi a ni tih sawiin, he mi kawnga hma kan sawn zel theih nan MLA Fund leh Fund dang awm thei ang chite hmangin hma a la tih a tarlang a. Chung hmalaknate chuan rah tha chhuah chho mek nia a hriat thu pawh a sawi a ni. Tuikum bial chu ram lailia awm kan nih avangin khawpui lian Aizawl, Lunglei, Serchhip leh Champhaiah te kan tharchhuahte hralh theihna remchang kan nei thaa, kan hman tangkai thiam a tul tak zet a ni. Kan chhehvela hnathawh tur hnaivai ber ber te hi kan thawhthiam chuan hna hmuhloh a awm dawn lova, ram leh hnam chhanna hnathawk kan ni bawk a ni, tiin Thinglian mipuite chu nasa zawka bei sauh sauh turin a fuih bawk.

Thinglian hi in 84 awmna khua a ni a. Mihring 531 cheng mekin, lo nei a eizawng hi chhungkua 55 an awm a. 2021 hian Buh Tin -11294 (Phur 3765) an thar a ni a. Buh thar tam ber hi Pu Lalpianthanga niin Tin 447(Phur 149) a thar a, Pu F. Ramdinsanga'n dawtin Tin 402 (Phur 134) a thar a, pathumna hi Pu Lalrelliana niin Tin 399 (Phur 133) a thar a ni. Thlawhhma kawngzawh upa ber Chawimawina Pi Lalthangpuii kum 65 hnenah hlan a ni. He Kutah vek hian zirtirtu thaa thlan Pu A. Lalthangkawla (L) leh sorkar hnathawk thaa thlan Pi K. Lalramsangite hnenah chawimawina hlan an ni bawk.

Vawiin Kut lawmna inkhawm hi Pu Jerome Hmingthansanga, Secretary, VC in a kaihruaia a ni.

Khuallian Er. Lalrinawma hi Pu Lalroliana Member, Sport & Youth Affair & Tourism Board leh mi pawimawh dangten an tawiawm a ni.