1529/2022-2023
Aizawl, the 10th August 2022: Vawiin chawhma khan Mizoram tlawha rawn zin mek Assam Minister pahnih Atul Bohra leh Ashok Singhal-te chuan Chief Minister Pu Zoramthanga chu a chenna bungalow ah hmu in inkawmna hun tha tak an nei a, Chief Minister hi I&PR Minister Pu Lalruatkima’n a tawiawm a ni.

Assam-Mizoram ramri chungchang sawiho a ni a, Chief Minister chuan ramri buai chingfel turin theihtawp an chhuah dawn tih lo sawiin nimin lama inbiakna hlawhtling tak neih a nih chu lawmawm a tih thu a lo hrilh a, State pahnih sawrkar leh mipuite inkarah inhriatthiam tawnna leh inrin tawnna a awm zel a pawimawh tih sawiin, ramri buai chingfel tur chuan hun an duh rei dawn a, harsatna awm zawng zawngte vawilehkhatah a vaia chinfel theih ni lo mahse a tahtawlin chinfel vek kan tum tur a ni, a ti a. An inkawm lai hian Assam Chief Minister Pu Himanta Biswa Sarma chuan rawn bia in Pu zoramthanga chuan Chief Minister-levelah inbiak a that thu a lo hrilh a, kumin August thla tawp emaw, September thla tir lamah emaw hun remchang a awm chuan New Delhi-ah inbiak an remti dun a ni.

Assam Minister te hian Chief Minister Pu Zoramthanga chu politician tawnhriat ngah tak a nih avangin a chungah rinna an nghat tih an sawi a, ramri buai chungchang chu State pahnih mipuiten an pawm tlan theih tura chingfel turin theihtawp an chhuah dawn tih an sawi a ni.

Pu Zoramthanga chuan Mizoram thar chhuah kuhva te Assam lamah police in an lo man thin chu pawi a tih thu sawiin, Mizoram thar chhuah chu Assam mi leh sate tho in an lei thin a, khaw chhak lam atanga dan lova rawn phurhluh nen hriat hran a har lo em em a, khawchhak lam atanga rawn kal chu a ro a ni a, Mizoram thar chhuah chu a ro ve hman lova, a la hring reng a, a hmel en ringawt pawhin awlsam takin a hriat hran theih a, hei hi Assam sawrkarin ngai pawimawh se, dan dik taka hralh chhuah a nih vangin Assam police ten harsatna siam tawh lo se a duh thu leh anni pawhin lo ngai pawimawha lo enzui turin a chah bawk a ni.