1530/2022-2023
Aizawl the 10th August, 2022 : National Bank for Agriculture & Rural Development (NABARD) Regional Office Aizawl chuan a vawiriatna atan National Handloom Day lawmna denchhenin Vanapa Hall Aizawl ah Handloom Exhibition vawiin khan buatsaih a ni a. Assembly Speaker Pu Lalrinliana Sailo Assembly Speaker chuan he exhibition hawnna hi hmanpuiin stall hrang hrang a tlawhin a nghaktute kawmna hun a hmang.

Exhibition hi Pu Thangchhinkhup Guite Officer In-charge NABARD chuan hawngin, Pu Dilip Kumar Kadam AGM NABARD in keynote address a pe a, Pi K. Lalmuanpuii Proprietor, Lenbuang Handloom chu visiting designer ani a, Pu B. Lalchhanzova Cod Nerc Director in hun a kaihruai a ni.

National Handloom Day hi India ram pumah kum 1905 a Swadesh Movement (Mahni ram dehchhuah ngei chawisanna movement) hriatrengnan kum 2015 atang khan lawm thin ani. Exhibition hian Ni 10 atanga Ni 12 August 2022 thleng a awh ang.

NABARD hi parliament Act No 61, 1981 hmangin 12th July 1982 khan India ramah din ani a, Mizoramah kum 1989 khan NABARD sub-office hi hawngin, kum 1989 khan office puitlingah hlankai ani.

NABARD hi loan pechhuaktu (Credit institution) ani a, Mizoram sawrkar tan loan pung tlem chi mamawhna hrang hrang atan a pechhuak thin a, bank hrang hrang ten loan atana an lo pekchhuah leh tur sum a puk tir thin bawk. Heng bakah hian hmasawnna kawng hrang hrangah sawrkar department te pui thinin, hmasawnna lama thawk thin NGO te pawh project grant a pe thin a, kawngsir bazar (Rural Haat) engemaw zat an sa tawh bawk.

Handloom day Celebration Exhibition ah hian NABARD thawhpui NGO heng Cod Nerc, NEIDA, Angels Business Promoters, Heritage handloom & Handicraft te hian an product te an phochhuak a, Thenzawl handloom kutchhuak te, Lenbuang Handloom kutchhuakte, Angels Business Food Packages te, NEIDA Agri products te leh Heritage Mizoram sahbawn te bakah Kawnpui Women Farmers Club te siam hrang hrang phochhuah ani.