1531/2022-2023
Aizawl the 10th August, 2022 : Vawiin khan Ngopa Welfare Committee, Aizawl te lehkhabu buatsaih “Ngopa History” chu Synod Conference Centre-ah Pu L.Thangmawia, HRD Board Vice Chairman chuan a tlangzarh.

He lehkhabu tlangzarh inkhawmah hian thusawiin “Mizo History ziak kan neih tawhah Mizoram Hmarchhak lam History ziak a tlem hle a. Ngopa tlangdung Lal tena Zoram tana an thawh hi haichhuah tur chhuanawm tak tak tamtak an la awm a. Tlawmngaihna lama duai bik lo ‘Kawka’ te chanchinte hi Zoram mipuiten an la hmelhriat lo hle a ni” a ti. Ngopa Welfare-in Mizoram Hmarchhak History bu rintlak tak mai an tichhuak ta chu lawmawm a tih thu sawiin hah taka zirchiang a, Zoram mipuite hnena phochhuah a nih theihnana rim taka thawktute chungah lawmthu sawiin hei hi Ngopa History chauh ni lovin, Mizoram History keu hawn belhna chhinchhiahtlak tak a ni a ti a, hei hian Mizo history ziaktute ngaihven hlawh thei turin Mizo history-ah bungthar a keu dawn a ni a ti bawk.

Pu Thangmawia chuan hripui leng karah sawrkar chuan chawl mai lovin a theih angin hna a thawk a, hun harsa tak kan hmachhawn chungin hmasawnna duhawm tak engemaw zat Ngopa khawtlang leh lengteng bialin kan hmu mek zel a ni a ti.

Lehkhabu sawihawngtu Pu B.Lalthangliana chuan “Ngopa tlangdung History ah thil chhinchhiahtlak tam tak a awm lain ziak a hlawh lo hle a, Mizoram hmundanga kan hmuh loh thil ropui tak takte a awm nual a, heng hi lehkhabu ka ziak leh thei a nih chuan ziah tel ngei ka tum a ni” a ti.

He lehkhabu buaipuitu Dr P.C.Biaksiama chuan “Mizo History bu ziaktu hmasate khan Zoram hmarchhaka kan Sailo lalte hmalak dan chanchin hi mumalin an lo ziak mang lo tih chu hairual a lo ni lo va, an hnu zela ziaktuten helam hawi zawng hian research an neih belh chuang bawk si lo va, Chuvangin a khaw neitu leh veituten hma kan lak mail oh chuan he lai bial hi history nei lo ang main a lo awm reng mai a ni” ttin “heng Sailo lalte hmalakna avangin Champhai Road hmar lam zawng, Manipur ramri thlenga ram zau tak Mizorama rin luh a lo ni thei a ni” a ti.

He lehkhabu tlangzarh inkhawm hi Pu P.L.Liandinga’n a kaihruai a. Upa Lalmalsawma’n hunserh hmangin Pu J.C.Dailova, Ngopa Valupa te, Pu C.Chhuanvawra leh Pu P.L.Thanga IAS(Rtd.) ten thusawiin Pu R.Zonunsanga, Chairman, Ngopa Welfare, Aizawlin lawmthu sawiin hun a khar a ni.