Tukin zing khan chu Sipai Lammual ah "Healthy Mizoram Campaign June 21- June 21, 2018" chu  Assam Riffles  kaihhruaina in 3rd International Yoga Day hmanna denchhena hman tan a ni a. Healthy Mizoram Campaign hawnna  leh Yoga Day hmanna ah hian Mizoram Governor Lt. Gen. Nirbhay Sharma (Retd) chu khuallian a ni a. Union Minister Of State For Railways Pu Rajen Gohain pawh he hun hi a rawn chhim a ni. 

Healthy Mizoram Campaign hawnna leh Yoga Day programme a khuallian Mizoram Governor Lt. Gen. Nirbhay Sharma (Retd) chuan hriselna kawnga Mizoram in hma a sawn zel a tul thu a sawi a. Healthy Mizoram Campaign chuan faina kawngah te leh hriselna kawngah te mipui nawlpui tan hlawkna rawn thlen ngei se a duhthu a tarlang a. Ruihlo, Cancer, zuk leh hmuam avanga taksa hrisellohna hrang hrang  te avangin Mizoram in  nundan phung hrisel zawk uar tharin leh taksa insawizawina nena nitin hun kan hman a pawimawh a ti. Yoga chu Mizoram ah mitam takin an la hlauthawng nia a hriat thu a sawi a. A hlauhawm loh thu sawiin sakhaw pakhat rinna nena sawizawm theih a ni lova. Sakhuanna han sawi em em tur awm hma daih kum 5000 liam tawh atang khan Yoga chu hman a lo nih tawh thu leh a hnuah sakhaw thenkhat zawmtu ten an hmang ve mai chauh a ni zawk a ti. 

Healthy Mizoram Campaign leh Yoga Day programme  rawn chhimtu, Union Minister Of State For Railways Pu Rajen Gohain  chuan Mizoram in hriselna kawnga hmasawn a tum chu tha a tih thu a sawi a. Healthy Campaign ah yoga telh ve a ni chu thil tihawm tak a nih thu leh khawvel ram 192 laiah mipui chhiarsenloh ten an hlawkpui mek a ni a ti a. Hriselna atan Yoga chu la hmang velo te pawn a thatna hria a an hman ve ngei a duhsak thu a tarlang a ni. 

Yoga insawizawina kaihruaitu Pu Ram Gopal Dixit-a chuan  yoga chu hriselna atan bakah natna khirh tak tak enkawl na atan pawh na tuar em em lova hman awlsam leh a hnulama thatlohna (side effects)   pawh nei ve lo, bungrua leh hmanrua mamawh hran lo a ni tih a sawi a. Taksa bakah  thluak sawizawi nan thlenga hman theih a ni a ti. 

Healthy Mizoram Campaign June 21- June 21, 2018 chuan kum khat chhung a awh phawt tur leh Mizoram hmun hrang hrangah huaihawt a ni tur thu Brig. MS Mokha, DIG, 23 Sector Assam Riffles chuan a tarlang a. Healthy Mizoram Campaingn hnuaiah  Yoga, Health, Healing, Naturopathy, Neurotherapy leh Drug Rehabilitation ah te hmalakna neih a ni dawn a, mipui hrisel zawknan an tih theih ang chinah Mizoram mipui te an thawhpui zel dawn a ti. 

Sipa Lammual a Healthy Mizoram Campaign hawnna leh Yoga Day programme-ah hian ahuhova Yoga insawizawina neih a ni a. He hunah Armed Forces, Zirlai, NCC leh Yoga insawizawina hun hmang thin te an tel a ni.