Vawiin khan Lai Students, Association (LSA) General Headquarters, Lawngtlai chuan Central YLA Hall, Lawngtlai-III-ah kum 2017 HSSLC exam-a Lawngtlai District atanga top 10-a lang phate chawimawina hun an hmang a. AH&Vety Minister Pu C.Ngunlianchunga'n a hmanpui.
Pu C.Ngunlianchunga chuan hlawhtling turin tum mumal tak neia lehkha zir a tul thu a sawi a. Taihmakna, rinawmna leh tum ruhna nena lehkha zir a, an zirna tibuai thei thil laka inthiar fihlim turin zirlaite a chah a. Zirlai tha chher chhuak tura zirtirtu mahni hnaa rinawm leh inpe zo tak an pawimawh thu a sawi bawk. Pu C.Ngunlianchunga chuan Lawngtlai District-ah Science stream zirna a awm loh avanga zirlaite’n harsatna an tawh thin thu sawiin, Lairam Isua Krista Baptist Kohhran thahnem ngaihna avangin Lawngtlai AOC Vengah Science stream zirna din thar a nih thu a tarlang a. Kum thara HSLC leh HSSLC exam-a pass tha top 10-a lang chinte chu laptop a pek vek tur thu a sawi leh bawk.
Khual zahawm LADC-a Chief Executive Member Pu T.Zakunga chuan zirlai ti tha chawimawi tlak an awm chu District tan inchhuanna tham a nih thu sawiin, chuti ang dinhmun chu luah zel thei tura tan la turin zirlai kal khawmte a sawm nghal a. LSA President Pu C.Kapkima pawhin fuihna thu tawi a sawi.
Vawiina Lai Students’ Association-in HSSLC exam-a zirlai ti tha an chawimawite hi Arts stream-a topper Lalrinzuali, Science stream-a 8-na Henry K.Vanlalmalsawma leh 10-na Freddy F.Zothangliana te an ni a. He’ng mite hnenah hian LSA-in thuziak an buatsaih a hlan bakah Minister hian a lo tiam tawh angin laptop a pe theuh va. Hemi rual hian a bial Lawngtlai West huam chhunga HSLC leh HSSLC pass zawng zawngte hnenah General English bu a hlan nghal bawk. He’ng top 10-a lang zirlai pathumte hi LADC hmingin CEM chuan Rs 5000/- theuh a hlan ve bawk.
