Vawiin chawhnu khan Aizawl District Pradhan Mantri Awas Yojana-Housing For All (PMAY-HFA) (Urban) Screening Committee chuan vawi 3-na atan NLUP Conference Hall-ah thutkhawmna an nei.

Meeting chuan PMAY-HFA (Urban) kalpui mekah Beneficiary Led-Construction (BLC) component hnuaia Detailed Report Project (DPR) tur atana dilna thehluttu chhungkaw 5257 chu State Level Sanctioning and Monitoring Committee (SLSMC) en nawn tur in a pawm a. DPR hmasa (1st DPR) ah Aizawl khawpui chhunga chhungkaw 864 chu Ministry of Housing & Urban Poverty Alleviation chuan a pawm  tawh a ni.

Aizawl District chhunga khawpui 4- Saitual, Darlawn, Sairang leh Lengpui-ah te  1st DPR tur kalpui bawk a ni a, verification neih tawh niin heng khawpui 4 atang hian diltu chhungkua 1950 te chu Meeting chuan State Level Sanctioning and Monitoring Committee (SLSMC) en leh tur atan a pawm bawk a. Application result hi State Level Sanctioning and Monitoring Committee (SLSMC)-in a chhawpchhuah hmain kar khat vel zawhfiah leh sawisel theihna hun siam chu District Screening Committee chuan relin hemi hnua siamtha leh endik turin UD&PA Department chu State Level Nodal Agency (SLNA) atan a pawm bawk a ni.

‘Pradhan Mantri Awas Yojana (PMAY)-Housing for All (HFA) 2022 Mission’ chu  June 2015-a puanchhuah a nih atangin Mizoramah pawh hmalak a ni a. He scheme hi awmze nei leh tha zawka  kal theih beiseiin State sorkar chuan June Ni 7, 2016 khan District Screening Commitee chu a din a. PMAY-HFA Beneficiary Led-Construction (BLC) component hnuaia dilna thehluttu te chu chenna in ngeia kal chilh niin Local Council, YMA, MHIP leh MUP te nen a endik an ni. 

He meeting hi UD&PA Director leh Committee Chairman ni bawk Pu Joseph H. Lalramsanga chuan a kaihruai a. Member kalte chu: Pu Lalruatkima, MLA- Aizawl West II; Pu Vanlalzawma, MLA- Aizawl West III ; Pu R. Vanlalvena, MLA- Aizawl South I; Pu H. Lalthangliana, AMC Municipal Commissioner; Pu P.C. Lalhmingthanga, AMC Mayor; Chief Manager UCO Bank; General Manager Mizoram Co-Operative Apex Bank Ltd; Chief Manager SBI Lead Bank Office, Aizawl; Regional Manager, Mizoram Rural Bank te an ni.