Vawiin khan Chief Minister Pu Lal Thanhawla hovin Sawrkar hotulute leh Department thenkhat aiawhten Chief Minister’s Office Cabinet Room ah International Fund for Agriculture Development (IFAD) project ‘Fostering Climate Resilient Upland Farming Systems in the North East’ kalpui dan turah a  ruangam duan leh ruahmanna siam te sawihoin meeting pawimawh tak an nei. 

Meeting ah hian IFAD project tobul te, hmalakna awm tawh te, Sawrkar leh IFAD thawhho chin te, project thil tum te, a kalpui dan tura a ruangam duan leh ruahmanna siam lailawk te chu Pu P.L. Thanga, Vice Chairman, NIB chuan a tarlang a. Meeting ah hian project hlawhtling taka kalpui anih theih nana tualchhung inrelbawlna leh thil awmte mil a project kalpui a pawimawh thu sawilan niin rawtna siam a ni a. Heng rawtna siam te hi IFAD Team lo  zin hunah Chief Secretary hovin zau zawka sawi nise an ti.

IFAD project hi cheng vaibelchhe 500 hu tur niin District pali – Champhai, Mamit, Serchhip leh Kolasib ah te kum 6 chhunga kalpui tur a ni a. He Project in a tum ber chu hlawk zawka tlangram lo neih zirtir leh kalpui a ni. 

Meeting ah hian Agriculture Minister Pu R. Lalzirliana; Vice Chairman, State Planning Board Pu H. Liansailova; NIB Chairman Pu J.H. Rothuama; Chief Secretary Pu Lalmalsawma; NIB Vice Chairman Pu P.L. Thanga; Planning & Programme Implementation Secretary Dr. C. Vanlalramsanga bakah Finance Department, Rural Development Department leh Agriculture Department aiawhte an tel a ni.