Vawiin chawhma khan Deputy Commissioner leh Chairman, District Disaster Management Authority, Aizawl District Pu Kannan Gopinathan leh Powergrid Corporation of India Ltd. aiawhin Pu S. Bhattacharrya, Deputy General Manager te chuan Powergrid hnuaia Corporate Social Responsibility (CSR) atangin Aizawl District Disaster Management Authority-in District chhunga chhiat tawhna thlen thulha tangkai taka a hman tur bik lirthei - Emergency Response Vehicle (ERV)- leina leh thawmthatna atana Rs.  20,04,852/- senna tur inremna thuthlung (Memorandum of Understanding) an ziak. 

Emergency Response Vehicle (ERV) hi chhiat tawhna hrang hrangah mamawhna a san em avangin DC Office-a gypsy hman lai pakhat chu thuam thain, ni 29 June, 2016 atang khan hman tan a ni a.  Leimin, in kang, tui tla zawnna leh chhiat tawhna hrang hrangah tum 35 vel zet hman a ni tawh a ni. DC Office-a thawkte atangin an hna pangngai piah lamah chhiatna thlenna hmuna che chhuak hmasa tur, Quick Response Team (QRT) ruat niin, ERV nen a rang thei ang berin chhiat tawhna hmun an pan thin. Amaherawhchu, lirthei hi a hlui lam a nih tawh bakah, duh angin hmanraw tul ang te a phurh kim theihloh avangin lirthei tha zawk neih anih theihnan Powergrid-te dawrh an ni a, anni’n lo remtiin, an CSR atang hian Tata Xenon 4X4 lei a ni dawna, chhiat tawhnaa chhanchhuahna hmanrua leh pawimawh dang te(emergency equipments) he lirtheia dah turte pawh lei tel a ni bawk ang. 

Emergency Response Vehicle(ERV) –ah hian emergency light (blue & yellow) hi disaster duty-a hman a nih chuan chhit thin a ni a, hei hi a pawimawhzia hriaa mipuite leh lirthei dangte pawhin kawng kan lo ken zung zung a pawimawh hle a ni. 

Attachment

  • Loading attachment...