Assam Rifles chhuahsan tur ram hman tangkai dan tur chungchanga Mizoram sorkar hnena thurawn pe tura din Advisory Committee-te chuan vawiin khan Aizawl Sipai Lammual leh a chhehvel a hmunah kalin an thlithlai. Advisory Committee hi an Chairman Revenue Minister Pu JH. Rothuama’n a hova. Member dang zingah MLA Pu R. Selthuama, Pu H. Raltawna, IAS Rtd., Revenue Department Consultant Pu R. Lalhmangaiha bakah Revenue Department officer pawimawh ten an tawiawm a ni.

Advisory Committee te hi AR Commandant Col. Preythush Pillai chuan a lo dawngsawng a. An chhuahsan tur chin leh an la enkawl zui tur chin te chipchiar taka kawhhmuhin helaia ram chungchang hrim hrim chu Mizoram sorkar leh sorkar laipui Home Ministry inkar ami a nih thu leh tuna a hmun nghaktu Assam Rifles te chu a veng tu leh humhalhtu chan chang an nih dan te a hrilhfiah a. Minister ho hian a hmunhma chipchiar takin an fang kual a ni.