Inspector General Assam Rifles(IGAR), East, Silchar bul Srikona a hmunpui nei chuan an kum khat tlin lawmna chikhat atan an hnuaia awm Assam Rifles Battallion hrang hrang te chuan Mizoram, Tripura leh Assam chhim-a thingtlang khaw enge mawzat an ‘adopt’(pawm) a. Mizoram bikah chuan hmar lamah Teikhang, a laili lamah Lianpui leh chhim lamah Hmawngbu khua te an adopt dawn a ni.
Heng an khaw adopt-ah te hian civil thuneitu te nen tangkawpin, a tahtawlin hmasawnna hna chi hrang hrangah te tha leh zung, sum leh pai sengin puibawm an tum a. Zirna lamah te, eizawnna kawnga te, hmasawnna ruhrel dinna kawng te, hmeichhia leh thalai te chawikanna leh an hmakhau ngaihtuahna programme duan kawnga te hma la ruahhmanna siam an tum dawn a. He programme kaltlangin heng thingtlang kilkawr takah te hian hmasawnna leh a mihring chengte dinhmun chawikanna kawnga hmathar an siam theih ngei an beisei thu Assam Rifles te chuan an sawi a ni.
Assam Rifles-in Mizoram, Tripura leh Assam chim lamah inenkawlna tha leh chak zawka hna an thawh theih nan nikum July ni 16 khan Headquarters Inspector General Assam Rifles(IGAR), East chu Silchar bul Srikona a hmunpui neiin a din tan a. Tun July ni 16 khian IGAR (East) hi kum khat a tling dawn a. Hemi pual hian IGAR(East) chuan tun thla chhungin Assam Rifles thupui ‘Tlang mite thian’ a taka an lanchhuah theih nan programme hrang hrang buatsaihin an kalpui mek a ni.
HQ IGAR(East) hotulu ber chu Major General Satish Dua, Sena Medal, Inspector General Assam Rifles (East) chu niin Mizoram-a HQ 23 Sector, Tripura-a HQ 21 Sector leh Haflong-a HQ 22 Sector te a enkawl mek a. Sector tin te hi Brigadier pakhat zelin enkawlin an hnuaia Battalion enegmaw zat an awm theuh bawk a ni.
