Staff Selection Commission hnuaia Paramilitary force hrang hrang - Assam Rifles Sipai leh Central Force dangte constable lak tura inpuahchahna kal zelah vawiin khan 26 Assam Rifles leh MZP tangkawpten ‘Pre-Recruitment Training Capsule’ naktuk atanga tan tur chu vawiin khan an Battalion Commandant Col. Gaurav Chaturvedi’n AR Cinema Hall-ah a hawng.

Training hawnna programme ah hian Commandant chuan Mizo thalai, he hna diltute chu inpekna tak tak leh tumruhna nen training nei turin a chah a, Mizo thalaite chu ram leh hnam tana inpekna thuk tak nei chunga heng hna te hi dil turin a chah bawk a ni. He training hi Mizo thalai he hna diltu zawng zawngte tan a nih thu leh a thlawn veka buatsaih a nih dawn thu a sawi a, Mizo thalai tam zawk ten he hna an dil theih nana hma la tu MZP chungah lawmthu a sawi bawk a ni.

Mizo thalai Sipai bakah Assam Rifles leh Force danga tang tumte tan 26 Assam Rifles in Duan lawk ang chuan he Training Capsule ni 20 awh tur a ni a, 26 AR leh MZP tangkawpten an buatsaih a ni. Sipai tang tum ten Physical Fitness leh Written an paltlang theih nan Assam Rifles instructor te chuan coaching an pe ang. Vawiin a hawnna programme ah hian thalai 150 chuang an tel a, an document te leh an Medical Fitness te endik a ni bawk a ni.

Lalhmachhuana, MZP General Secretary chuan hna vang tak kara hnaruak 297 lai Mizo thalaite tan a inhawng chu a vanneih thlak hle a, he kan chanvo hi kan luahkhah ngei theih nana theihtawp chhuah turin hna diltu zawng zawngte a chah a ni.

Physical Training hi zing dar 6:00 atangin zing dar 7: 30 thleng AR Ground a neih a ni anga. Written test atana inpuahchahna chu zing dar 9:30 atanga chhun dar 12:30 thleng AR Cinema Hall-ah neihpui ang.