Oil leh Gas renchem puala chawlhkar hnih chhung 15 - 31, January rampuma hman tan mek chu vawiin Thawhtanni khan Mizoramah chuan hman tan ve a ni a, Food Civil Suplies & Consumer Affairs Minister Pu H. Rohluna’n I & PR Auditorium-a inkhawm neihah a hawng a ni.
Fortnight hawnna inkhawm hi FCS&CA Addl. Director Pu Rokunga Ralte chuan a kaihruai a. Fortnight hawngtu Minister chuan Oil leh Gas te hi mihring khawsak inrelbawl nana a loa kan awm theih loh a tling tawh a, chutih laiin a lakchhuahnate hian tawp chin a neih ve ngei a rinawm avangin kan hmuhchhuah ang angte chu renchem leh daihzai thei ang bera hman thiam a tul a ni, a ti a. Oil leh Gas tharchhuah nei ve lo, state dang atanga innghat Mizoram chuan a hmuh theih ang angte chu a daihzai thei ang bera mipui hnena pechhuak turin theih tawp a chhuah thu a sawiah Pu Rohluna chuan eirawngbawlna Gas pechhuak tur 12 tih fel mek anih thu leh hemi bakah hian a dang 9 a tan advertisement te tih chhuah leh tura hmalak mek a ni a ti a. Gas dealer 19 thingtlang khaw hrang hranga hawn belh theih anih hunah chuan tun aia awlsam zawka mipui mimirin eirawngbawlna gas an hmuh theih a beisei thu a sawi a ni.
Minister chuan Meidum-ah Gas a awm ngei tih hmuhchhuah anih tawh thu leh a thawktu company te pawh an phur hle thu sawiin hmuhchhuah theih zat tur chiah erawh finfiah a la ni lo, a ti a. Multi National Company 3 laiin Mizoram hmun hrang hranga Oil leh Gas zawn hna an thawh mek thu te, thil beiseiawm taka a kal dan te a tarlang bawk a ni.
Vawiina inkhawmah hian Horticulture Dy. Director Pu Vanlalruata Chenkual chuan Mizorama Jetropha (kang damdawi) chin dan te leh he kang damdawi atanga oil tangkai tak hmuhchhuah anih theih dan te sawiin oil renchem kawnga puitu tangkai tak anih dan a sawi a.
Lirthei neitute tana oil leh hriak dang chi hrang hrang renchem dan awlai tak, mipui mimirin an hriat tur tul pawimawh hrang hrangte bakah eirawngbawlna gas renchem dan thil tangkai tak tak sawichhuah a ni bawk a. Oil leh Gas daihzai zawka sem rual anih theihna tura Consumer Union thathawhte pawh vawiin inkhawmah hian tarlan a ni.
Oil leh Gas renchem chungchanga beihpui thlak, chawlhkar hnih chhung zet neih turah hian India Oil Company te bultum leh huaihawtin programme chi hrang hrang duan a ni a. Mipui mimir hnenah hetiang kawng inzirtirna leh inhrilhhriatna te buatsaih a ni ang a, zirna In hrang hrang hnenah Oil leh Gas renchem lam hawi painting, essay inziah siakna te huaihawt tum a ni.
