1085/2023-2024

10.07.2023: Commissioner & Secretary, Home Department kaihhruaina hnuaiah vawiin khan a pisa ah Assam Rifles, Bn. Hqrs Zokhawsang ram thenawma lo neitute tunhnaia AR lamin an ram kaltlang an phal loh chungchang uluk leh ngun taka sawihona neih a ni.

Commissioner & Secretary, Home Department-in lo neitute hnenah thil kalphung leh nih dante leh Home Department in AR insawnna tur chungchanga hma a lak dante kalkhawm hnenah a sawi a. Lo neitute hnen atangin harsatna an tawh hrang hrang chungchang ngaihthlak a ni bawk.

Sawihona neih a nih hnuah a hetiang hian thutlukna siam a ni:

1. Zokhawsang leh a chhehvela loneitute'n thu an hriatfiah tawk loh avanga thu thehdarha Mizoram Sawrkar leh Home Department an puhna chungah thupha an chawi mai bakah Assam Rifles te chungah pawh thinlung takin thupha an chawi bawk.

2. By Pass Road siamthat a nih hma chuan loneitute'n Assam Rifles, Bn. Hqrs, Zokhawsang kal tlangin Thawhtanni (Monday), Thawhlehni (Tuesday), Ningani (Thursday) leh Zirtawpni (Friday) ah te lirthei nen dar 4:00 am - 6:00pm inkarah an kaltlang thei ang a, Nilaini (Wednesday) leh Inrinni (Saturday) ah te hian lirtheia kaltlang a rem dawn lo thung. Ke erawh chuan engtik niah pawh kaltlang theih a nih tur thu rel a ni. Hei hi Col. Mukesh Shukla, Co, 2 AR pawmpuina a tihfel nghal a ni.

A chunga remruatna hi security thil leh tul bik thilah Assam Rifles te leh Home Department ten an ennawn thin ang.

3. By Pass road hi a rang thei ang bera siamthat a nih theih nan MPWD chu hma la nghal tura tih a ni.

4. Loneitute lungawilohna lantir tum pawh vawiin ni 10.07.2023 atang hian thulh nghal a ni.

Heng thutlukna siam hi Home Department, Zemabawk Local Council leh Khuangkhaului Zau Association aiawh theuh te'n hming an ziah hnan a ni.