Administrative Training Institute (ATI) leh Assembly Secretariat tangkawpin an buatsaih Sorkar senior officer chin te tana Assembly chungchang zirhona chu vawiin nileng khan Assembly Annex Conference Hall-ah hman a ni a. Chief Minister Pu Lal Thanhawla’n a hawng a.

Under Secretary leh Joint Director chin chung lam zirhona hun hi hawngin Chief Minister chuan vawiina he hun buatsaih chhan tarlangin Assembly hnuaia Committee peng hrang hrangin an hnathawh leh pawimawhna te Sorkar official lam ten hre thar se a duh thu a sawi a. Legislator hoten Committee a an thu dah te Sorkar lamin ngaihven chak lehzual se tiin Chief Minister chuan Assembly a Finance leh Legislation lam thurel te ngaihpawimawh a tul a ni a ti a. Assembly zawhna chhan thu ah te, House a putluh tur bill buatsaih kawngah te Sorkar officer lian te chu fimkhur lehzual turin a chah a ni.

Rampuma dan siam kawnga thuneitu sang ber chu Parliament a nih angin state ah pawh Legislative Assembly chu thuneitu pui ber a ni a, chuvangin dan siam tura thlan tlin leh a taka thawktu official te inkara thawhhona tha tak awm a tul thu Pu Lal Thanhawla chuan a sawi lang bawk. Rinawmna leh rinawnna a inlawm tawn tur kan ni tiin Chief Minister chuan District Level ah mipuite lungawi lohna thlen na tur Public Grievances Redressal Cell din anih tawh thu a sawi bawk.

Vawiina zirhona hunah hian Parliamentary Affairs Minister Pu Lalsawta chuan Assembly hnathawh dan leh a kalphung tlangpui a sawi a. Assembly Speaker Pu R Romawia’n Legislature leh Executive inkar leh an thawhhona dan tur a hrilhfiah a. House a Bill leh Resolution putluh dan chungchangte, House in a pawmpui hnu a Sorkar lamin a bawhzui zel dan tur tlangpui Opposition Group Leader Dr.R. Lalthangliana’n sawiin Sum chungchang leh a kaihhnawih thil hriat tur pawimawh tak tak te chu MLA Pu R.Selthuama’n kalkhawmte a hrilhfiah bawk a ni.

Chawhnu lama Sorkar officer ten hun an hman zuiah Assembly Secretary Pu Ngurthanzuala chuan House Committee hrang hrang thuneihna leh Member tin te chanvo a sawi a. Assembly Additional Secretary Pu Vanlalnghenga chuan Assembly Committee kalphung chipchiar takin a hrilhfiah bawk. Hemi zawh hian sawihona hun hman a ni.

Vawiin inkhawm ah hian Chief Secretary Pu Vanhela Pachuau IAS pawhin thu sawiin Sorkar hnathawk tam tak ten sorkar hna aiin mahni leh pawl thil dah hmasak an chin thin chu bansan a hun tawh thu te, Office inkhuahkhirhna tha zawk neih a tul thu te bakah Sorkar dan leh hrai hriatchian leh zir peih a tul zia te huamzau takin a tarlang a ni.

Vawiin inkhawm hi ATI Director Pu R .Lalvena IAS in a kaihruaia. A tel tur an sawmchin te an kal tha thawkhat hle a ni.