Nimin Dt 21.01.2016 khan Mizoram Assembly on Estimates Committee te chuan Kaladan Multimodal Transit Transport Project hnathawh mekte chu an tlawh a, chak zawka hna thawh a nih theih dan tur an rawn en.

Estimates Committee KMMTP tlawhtute hi an Chairman Pu Lalrinliana Sailo, MLA leh Member pahnih Pi Vanlalawmpuii Chawngthu, MLA leh Pu R. Vanlalvena, MLA te an ni a, member dang Dr. Ngurdingliana te, Pu Vanlalzawma te, Pu T. Sangkunga te erawh chu damlohna avang te leh hna pawimawh dang avangin an tel remchang lo a ni.

Chairman Pu Lalrinliana Sailo chuan, tlem lai deuh khan Myanmar chhung lama he Project hnathawh chinte enin Estimates Committee te hi kan va kal a, Sittwe Port (Jetty/ Lawngkailawn) te, chuta tanga Chhimtuipui rawn zawh chho zela kan kawngpuiin a va chhun tur Pallewa Port (Jetty/Lawngkailawn) te chu a thawktu Essar Company ten kum hnih chhungin kan zo ngei ang tiin an intiam a. Tin, Pallewa atanga Zorinpui (Ramri) thleng kawngpui laitu tur pawh tunah Tender vel mek a ni. He kawng pawh hi laih huphurhawm leh harsa tak tur a ni hmel lohva kum hnih emaw chhungin an zo mai ang. Chuvang chuan keini lam hi tun aia kan thawh chak a ngai a ni. Kawngpui bikah pawh hmabak kan la ngah em em a, hemi zawhah Land Custom Station te, Integrated Check Point te, Truck/Bus Terminal leh thildang tam tak Zorinpui hmuna buatsaih tur a la awm si a, Myanmar ram chhunga an zawh fel hnuah kan la buai rei lutuk ang tih a hlauhawm a ni, a ti.

Revised Estimate ang chuan Mizoram chhungah Km 90.82 laih tur a ni a, tunah hian Overall Physical Progress chu 62.20% a ni mek a ni.

Estimates Committee te hi KMMTTP enkawltu PWD Multimodal SE, EE leh SDO te bakah District Officials pawimawh leh LADC EM leh LADC Official thahnem takin an tawiawm a ni.