Foram for Social Development of Maraland (FOSDEM) leh Mizoram Information Commission te tangkawp ten an buatsaih “R.T.I. Awareness Campaign” chu M.A.D.C. Forest Hall, Siaha-ah vawiin chawhma dar 11 : 30 khan hlawhtling taka neih ani.

He R.T.I. Awareness Campaign hi Pu N.Vabeiratlua MIS, I&PRO Siaha chuan a kaihruaia R.T.I. Awareness Campaign neih anih chhan leh neih anih dan te mipuite hnenah sawihawnna a nei nghal a, Pu Lal Dingliana IFS (Rtd) Chief Information Commissioner (CIC), Mizoram Information Commission chuan khuallian niin a hmanpui ani. Thu sawiin khuallian chuan RTI hmanga mipuiten an zawhna te chu chhan ngei a ngaih thu a sawi a, SPIO ten mipuite tan hna tha tak an thawk ani tih an hriat a pawimawh thu a sawi bawk. RTI Act hi khawtlang, Society leh mitin tan a that thu leh Corruption venna tha ber ani tiin RTI Rules pawh tun aia tha leh changtlung zawk a kalpui tum mek anih thu a sawi bawk. RTI Act hi zirlai ten ngaihven se a duh thu sawiin langtlang sawrkar leh sawrkar dik neih theih nan tangho turin kalkhawmte chu a sawm ani. Pu K.Riachho IAS (Rtd) Chairman, Forum for Social Development of Maraland (FOSDEM) pawhin thu sawiin mitin ten sawrkar tha leh felfai neih kan duh theuh a, hemi anih avang hian langtlang sawrkar kan mamawh ani tiin RTI Act in a tum ber pawh langtlang sawrkar neih hi ani, ati bawk.RTI Act hi Mizoram in kan chhawr tangkai hle ani tiin tun dinhmunah khawvel ram 90 vel in RTI Act hi an hmang mek ani ati a, RTI Act hmanga zawh theih chi hrang hrang te kimchang taka tarlangin he dan hi mipui ten a tangkai thei ang bera kan hman a duh thu a sawi bawk ani. He Campaign neihna ah hian Dr HTC Lalrinchhana, Chief Judicial Magistrate pawhin thu sawiin RTI Act hman tangkai dan hrang hrang te a sawi ani.

R.T.I. Awareness Campaign neihna ah hian Pu S.Hiato, Ex-Minister, Pu R.T. Zachono, CEM, MADC , Saiha khawpui chhunga Department hrang hrang hotute, Village Council Member te,Tlawmngaipawl hrang hrang hruaitu te leh School naupang te an tel a, he Awareness Campaign ah hian programme karlakah zaithiam hrang hrang ten zaiin mipui an awi a, zawhna leh chhanna hunte hman niin heng mipuite zawhna hi Resource Person hrang hrang ten an chhang ani. Dr Lalzaidami Solo, Executive Member, FOSDEM chuan lawmthu sawina neiin he Awareness Campaign hi a titawp ani.