Vawiin hian Mizoram Assembly Committee pawimawh pakhat Committee on Local Fund Account (COLFA) te chuan 13th Finance Commission sum atanga siam Thenzawl khaw chhunga PCC Pavement pahnih a hmunah tlawhin an en a, Thenzawl Village Council member te nen inkawm hona hun an hmang bawk.
Thenzawl VC te nen Thenzawl Rest House a an inkawmnaah COLFA Chairman Pu John Siamkunga chuan, Local Body ten sawrkar sum an hmannaah Cashbook mumal lo te, Voucher fel lo te, mahni thua hna lo kawih pen hlek mai chingte an awm thin thu sawiin chutiang tih chingte chu en liam mai theih a nih loh thu a sawi a, a tul chuan Anti Corruption Bureau ah te, Central Bureau of Investigation thleng pawha kal emaw Assembly hmaa pharh mai a nih thin tur thu a sawi a. Mipuite sum hmangtu mi tinte chu dik tak leh dan ang thlapa kal tum thin turin a fuih a ni.
Member Pu R. Vanlalvena pawhin thu sawiin ram mipuite an fing tial tiala, an thikthu pawh a chhe tial tial bawk a, sawrkar sum diklo taka hmangtute tan jail luh a sam ta riau mai, dik takin danin a phut ang zelin engkim kan tih a tul ta hle a ni, a ti.
Member dang Er. Lalrinawma pawhin, ram mipuite sukthlek han en hian thil diklo titute hi hrem an chak ani tih kan hmu thei a, chuvang chuan mipui sum hmangtute kan fimkhur a tul hle. Fund reng reng hian a hman dan tur ruahmanna, Guidelines a neih vek vangin Finance Commission atanga sum kan hmuhin chu sum hmandan tur chu hriat vek kan tum thin tur a ni, a ti.
Thenzawl VC te leh COLFA member te inkawmnaah hian Assembly Secretariat Committee Officer Pu John Lalrinawma pawhin COLFA din chhan leh an hnathawh chungchang sawifiahna a nei bawk.
Inkawm hona neih hnu hian COLFA hian 13th Finance Commission sum hmanga PCC Pavement siam pahnih Dinthar venga mi Metre 70 a sei, metre 3 a zau Rs. 2 lakh senna leh VC House leh AMFU Bazar inkar a mi Metre 118.30 a sei, Metre 2.5 a zau, Rs 2.78 Lakh senna te chu a hmunah an tlawh nghal a ni.
COLFA ten Thenzawl an tlawh hi Assembly Secretariat thawktute leh LAD Jt. Director Pu Lalchhuanawma'n an rawn tawiawm a, Serchhip District SDC, DLAO Charge la mektu Pu Lalfakawma Chhakchhuakin a lo dawng sawng a ni.
