1241/2022-2023
Dated Serchhip, the 14th July, 2022: Vawiin hian Mizoram Assembly Committee on Local Fund Accounts (COLFA) te chuan Chhiahtlang daia Serchhip Solid Waste Management Centre hmunhma tura buatsaih mek tlawhin an hnathawh dan an zirchiang.

An Chairman Pu C. Lalmuanpuia chuan, tunlai khawvelah bawlhhlawhin harsatna min siam sak nasa a, kan changkang zela bawlhhlawh kan ngah tial tial a, mipui kan pung ve zel bawk a, nakin thlenga kan ramin kan mamawh bawlhhlawh sawngbawlna tha hi kan mamawh em em a ni. Chuvang chuan COLFA pawhin a ngai pawimawha, hmun tinah bawlhhlawh sawngbawlna tha kan neih theih nan theihtawp kan chhuah zel a tul a ni, a ti. Committee member te hian Solid Waste Management Centre sak meka thil hriat duh an neih hrang hrangte zawtin, an hnathawhte hi a hmunah an en sak a. An Chairman Pu C. Lalmuanpuia hovin member te Pu Nihar Kanti Chakma, Pu C. Lalsawivunga leh Dr. Vanlaltanpuia te an tel a ni.

Serchhip khawpui tana Solid Waste Management Centre hi Chhiahtlang daia Tualthah Mualah buatsaih a ni a, a hmunhma zau zawng hi 4000 sq.mtrs a ni. A hmunhma buatsaih hna (preparatory stage) thawh nan hian Special Assistance for Capital Expenditure Free Loan (SASCE) sum Rs 60 lakh hmuh a ni a, a panna kawng, Main Gate, Site office, RCC Tuizem, Internal Road, bawlhhlawh thliarna tur platform leh a hung hnate thawh tawh a ni a, Contractor hi Pu Lalthianghlima a ni. Kumin January thlaah hna tanin tun thla hian zawh thawkhat a ni ta a, Solid Waste Management Centre puitling sak chhunzawm nana sum hmuhna tur dap zui mek a ni.

Committee on Local Funds Accounts te hi Pu Lalmuansanga Ralte, MCS, Addl.DC, Pu Saidingliana Sailo, Addl. SP leh Urban Development & Poverty Alleviation Department hotuten an lo dawngsawng a ni.