Committee on Estimates, Mizoram Legislative Assembly chuan July 15 khan National Highway 54 Km 118 to Km 153, Buichali atanga Kawnpui inkar laihzau leh siamthat hna thawh mek chu a hmunah tlawhin hnathawh muan chhan te, Contract estimate vawihnih lai ennawn a tihpun chhan te leh hnathawh that leh thatloh te an endik a. Tunhnai a tlawmngai pawl hrang hrangin hnatlanga an siamthat Kawnpui leh Kolasib inkar te pawh thawmthat dan tur ruahman a nih theih nan an endik nghal a ni.

Committee on Estimates ah hian Pu Lalrinliana Sailo, MLA a Chairman a, Dr. Ngurdingliana, MLA, Pu Vanlalzawma, MLA, Pu R.Vanlalvena, MLA leh Pu T.Sangkunga, MLA te member an ni. He National Highway 54 siam that hna endikna ah hian Contractor ABCI Infrastructure Private Ltd. hnathawh viltu PWD National Highway Circle II aiawhin Er. Henry Lalmuankima, SE, Er.Lalsangliana Chhakchhuak, EE leh an thawpuite, Assembly Officer-te leh IPRO bakah Pu Rajiv Baid, Executive Director, ABCI ten MLA te hi an tawiawm a. Contract thawktute chuan an hnathawh dan te sawifiah in kawng siam hna a muanchan em em chhan hrang hrang te lehkha ah ziakin an chhang a ni.

National Highway 54 Km 118 to Km 153, Buichali atanga Kawnpui inkar 2-lane a laihzau, alkatra luan, side drain siam, retaining wall rem leh a kaihhnawih hrang hrang thawk tur hian ABCI Company hian contract a chhang a. Helai kawng siam hna hi Package 1 leh package 2 ah then a ni. Report in a tarlan dan in work order te hi dt 8.7.2009 leh dt 21.3.2009 ah chhuah a ni a. Date 22.7.2011 leh dt.4.4.2011 ah te Package 1 leh 2 te hi thawkzo hman tura chhut a ni. Chhan hrang hrang vangin Contract-te hi vawihnih ennawn leh a siamthat a ni a, dt. 7.8.2014 leh 25.8.2013 ah thawkzo tura ruahmanna siam a nih leh hnu in hnathawh zawh hun hi December 2014 leh April 2014 ah te sawn hlat leh a ni. Tun dinhmun ah Package 2 Buichali leh Khamrang inkar chu siam zawh tep a ni tawh a, Package 1 Khamrang leh Kawnpui inkar pawh huntiam thlen hma a thawh zawh tumin hmalak mek a ni. ABCI hotute chuan kawng siam zawh tawh chhe leh lai te awm chhan hrang hrang zingah lirthei veivak tam takin alkatra luan zawh hlim hlawl te an zawhlui thin a, chu chuan anih tur ang nih tir lovin a chhe duh hle a ni an ti a. Kawngpui a Alkatra luan thar te hi darkar 24 chhung tal lirthei ten chil lo se a tha ber a, chu chu zin veivak te pawn hriat thiampui se an duh thu an sawi a ni.

MLA-te chuan NH-54 siam hun chhung rei ta lutuk chu fello nia an hriatthu te, kawngsiam hna thawh chhelai te zawnchhuah a siam that tir nghal te leh hna chak taka thawh zung zung a nih theih dan tur kawng te dap tha in an hriat vanga tlawh an nih thu an sawi a. NH-54 chu Mizoram hnuk a nih avangin siam zawh thuai a ngai a. A pawimawhzia hi sawi tam ngailovin hriat vek a ni a, Sub-contract thawktute pawh Mizoram rohlu siam hna an thawh avangin kuttlinglova hna thawk duh reng reng lo turin an ngen a ni. Khamrang leh Kawnpui inkara Darnam peng bul, nikum leh kum hmasa lama lirthei tam tak tanna pawh a bika siam uluk tur leh kumin fur hun chhunga harsatna a thlen nawn lohna tura siam nghal turin ABCI hotute pawh MLA-te hian an hrilh a ni. Kawng endikna ah hian side drain siam tha tawk lo te, Alkatra luan khawk leh te leh Lungrem himtawk lo nia ngaih thenkhat te hmuh chhuah a ni a. Hengte hi siam nghal turin ABCI hnathawkte chu hrilh nghal niin an ni hian siam that nghal an tiam a ni.

Contract sum 9% hmanga hnathawk viltu atana chhawr PWD Engineer te pawh Kawngpui siam chu vil uluk tura hrilh an ni a, Junior Engineer an chhawr te pawhveivahna atana an mamawh lirthei te thleng pawh ruahman sak ni thei se tha an tih thu an sawi bawk a ni.